Monday, April 27, 2009

膠膠地


Seven Pounds
Will Smith太夾硬來.........

保持通話
我鍾意原作多啲,因為真係由頭到尾,係一個電話亭發生。
呢套後尾都係變咗陳木勝style嘅普通警匪片。

Wednesday, April 22, 2009

坐崩電影之最後衝刺

好耐之前係The English Patient已經覺得Kristin Scott Thomas好靚,
深邃眼睛,極對稱嘅輪廓,根本天生就係一個古典美人,唔做明星都唔知做咩好。係呢套法國電影I've loved you so long裡面,做一個極度自我封閉嘅中年女人,做得非常好。
節奏都係一般法國戲咁啦,劇情都係淡淡然咁啦,其實無咩特別,不過你又想睇晒佢。

Steven Soderbourgh唔再繼續拍盗海豪情,拍游擊之父哲古華拉。
以前細個對Che都幾好奇,睇過有關佢生平嘅書,又睇過佢寫果本電單車旅遊日記,之前都睇過改篇自日記果套戲The Motorcycle Diaries, Gael Garcia Bernal做哲古華拉果套。

然後長大,對革命、英雄、烈士種種浪漫幻想都毀滅之後,
就好討厭哲古華拉被「聖人化」,包括某議員穿他的頭像T-shirt為形象一事,都極之反感。
只係一個打游擊嘅醫生,只係象徵一個年代、一個地方、一種信念、
無必要將佢當做偶像、當神咁拜,神聖化。

哲古華拉都係拎住機關槍去殺人嘅人,都係人一個。
不過總比拎住香焦去掟人有型得多。

蘇得堡嘅casting有啲問題,Benicio Del Toro唔係唔夠有型,只係身形太大舊,牛高馬大,唔係太似哲古華拉,做哮喘發作都無咩說服力咁,雙眼亦都無佢本人咁有神,即使滿臉鬍鬚,我覺得佢做Fidel Castro會更神似!因為卡斯特羅健碩好多!

同The Motorcycle Diaries一樣,呈現出來嘅Che都係經常睇書,好有智慧咁(打游擊都仲要睇書,我都唔知佢點拎野),經常思考,重視秩序,視軍令如山,總能夠與人打成一片,得人歡心嘅領袖。劇情其實講佢打緊游擊,搞緊革命嘅時候,節奏有啲慢,有啲悶,唔知點解無咗蘇得堡獨有嘅爽快感。


好耐無睇過有水準嘅小品喜劇喇,呢套真係超好笑,英式幽默,加少少屎尿咁啦,哈哈。

Tuesday, April 21, 2009

可能係最後一套坐崩電影......



同坐崩會成員一齊睇星期二「平飛」戲The Reader,睇到一半有人打電話黎,睇完再覆電話原來叫我聽日返工......因為太突然,所以最覆人「聽日唔得」改為後日返。

就係咁,The Reader隨時成為最後一套坐崩會電影,暫時。

新工係做freelance,第一次做坐館,心情未能調整,好緊張~~~

原因一:剛適應坐崩日子,突然要重回戰場,淨係諗起要早起身都想死。

原因二:收左風,果間公司都好地獄下......要做埋regional野,好古怪。

原因三:自己玩既project差少少就完,點算,一返工,邊有時間完成......

希望能盡快以freelance心情去面對,隨遇而安啦。有咩唔對路,拿拿林速逃!




講返The Reader。

唔知點解,睇見肥溫同男主角親熱戲,好有「採陽補陰」嘅感覺,有啲不安,好似最近啲新聞,淫賤女教師同十三歲學生通姦之類,一位熟女利用少年嘅身體尋求滿足......有啲變態。即使最後變成係「愛」,不過不見得呢份「愛」有幾好,對女主角好似微不足道,話走就走,而男主角就終身活在佢嘅陰影下......其實都幾悲哀,結局都好沉重,原來係一個悲劇。

所以話,第一次,係幾咁重要呢。我泛指所有「第一次」,未必係肉體上。即使係第一次戀愛、第一次失戀、第一次說謊、第一次背叛、第一次享受......所有嘅「第一次」必然係印象最深刻,如果有少少唔對路,足以影響以後每一次。

被過去影響未來嘅判斷或者感覺,係人嘅弱點,要刻服就要好多勇氣。如果你人生裡面,曾經有人令你發噩夢、生不如死、肝腸寸斷、死去活來......必會留下陰影,而你永遠帶住呢個恐懼生活,好似有一部份嘅你,永遠都走唔出當日嘅困局。呢樣野其實真係好得人驚,因為恐懼而錯失日後好多野,再回頭時,一切已太遲。

男主角一生都封閉自己,到女主角死埋,自己個女都長大埋,人到中年時,先重新有勇氣去放開,去面對。有人花上幾十年,有人花上一生都未做到,你自己還有選擇能力的話,其實可以盡量縮短活係陰影下嘅時間,唔洗再提心跳膽生活,只係需要勇氣,好多好多嘅勇氣。

肥溫真係做得唔錯,不過我始終鍾意「浮生路」,佢做得更仔細。The Reader擺名係攞獎戲,佢憑此戲拿最佳女主角一啲都唔奇,如果憑更加難演嘅「浮生路」贏就更加勁喇。

Monday, April 20, 2009

Classic : Fred Astaire

"Dancing is a sweat job." - Fred Astaire


Fred Astaire同Ginger Rogers係電影Top Hat裡,經典跳舞一幕,二人如此優雅、浪漫,真係睇十次都唔厭。而且有種deja vu嘅感覺,似曾相識。




另一套Royal Wedding,1951年已經咁前衛玩visual illusion。

Fred Astaire舞步輕盈跳脫,氣質超然,戲裡戲外都係風度翩翩,衣著講究,公子一樣,真係好仰慕佢,佢完全係劃時代嘅人物,影響力無窮,亦都無前無古人,後無來者。點解依家無啲咁classy嘅藝人呢?

JCVD,真真假假


真亦假時,假赤真。

當成龍自以為自己係所有中國人嘅大哥、口出狂言時,另一位動作巨星尚格雲頓呢,就係呢套戲裡面做返自己。大家都係幾十歲人,大家都係「國際動作影星」,大家都係最近拍咗套非動作片,高下立見。

成龍係「新宿事件」都仲係做緊「大哥」時,尚格雲頓就做返自己。

戲裡佢好潦倒、失落、倒霉,人到中年,兒女又唔認佢,荷里活又唔再要佢,世界又遺忘咗佢,一副老骨頭,要再打打殺殺已經有啲勉強。

佢返去家鄉比利時諗住休息下,點知遇著一場劫案,自己糊里糊塗被當成賊,脅持一班人質。佢無成龍式呈英雄、扮大佬,反而同情劫匪,我地以為佢會打餐飽,以為會警惡呈奸打破班個頭,點知佢一直順從賊人要求,仲係一個和平份子,勸服賊人不要開槍。

片中一段六分鐘尚格雲頓嘅自白,見到完全另一個佢,無諗過呢個"Muscles from Brussels",一向只會打打殺殺嘅動作演員,突然流住眼淚,演出深情剖白,內容完全係佢自己創作,非劇本對白,好感人,好真實。

完全做到「假戲真做」,亦真亦假嘅情節,非常另類嘅尚格雲頓電影。好似「拼命戰羊」the wrestler嘅Mickey Rourke一樣,希望世界再俾多次機會佢地,一個突出嘅come back傑作。

註:好多情節都係沿自真實,好似同前妻打官司爭兒女撫養權;不過戲裡佢窮只係為配個劇情而虛構,佢一直都拍好多電影,係保加利亞同家鄉比利時好出名,應該好有錢。

Sunday, April 19, 2009

Thursday, April 16, 2009

Hunger



非常震撼的電影,不能錯過。

改編真人真事,1981年北愛爾蘭共和軍成員Bobby Sands,在獄中絕食66天至死。

我真的不懂北愛的政治,只知道經常有人亂放炸彈、示威、襲擊,很多平民死傷,我自己覺得不管那些人的政治立場是什麼,亂殺平民、視死如歸的狂人,也就是恐怖份子。

別管這些政治,從電影的角度看,此戲非常震撼,很多令人皺眉的暴力畫面,嘔心情景,好像整個囚室的牆都是屎尿(請到wiki參看"dirty protest"),或是囚犯被毒打的情景,十分真實,所以令人心痛。用上很多single shot和定鏡,畫面是平靜,氣氛卻冰冷得令人窒息。將囚犯的絕望、孤立無助的感覺,很真實地呈現出來。

全戲最到肉、最令人屏息的一場戲,沒有歇斯底里的毆打或反抗,卻是男主角和牧師面對面坐著對談的一幕,維持了17分半鐘的定鏡。只憑二人的對話、神情、語氣,就製造了一個小高潮,不得不佩服兩位演員,還有導演準確地,運用鏡頭去製造氣氛。

我們要同情恐怖份子嗎?

在說不清對、錯的世界,只是純粹地出於人性的本能,同情那些慘受暴力虐待、失去自由的人。

演Bobby Sands的那位Michael Fassbender,是「戰狼300」其中一個肌肉男。在此戲要演一個絕食者,他沒有了六舊腹肌,剩下一身排骨,6呎高的他最後只得59 kilos(約130磅)!看著那些胸骨、助骨、脊骨都外露出來,真的十分、十分可怕!

Wednesday, April 15, 2009

噩夢

昨晚看完歐聯,早上六時才能入睡,造了個噩夢。夢裡我在鏡子見到自己一臉都是毒瘡,面上每個位置都幾乎爛掉,不停流血流膿,十分痛楚,我用紙巾在抹掉血水,然後在左邊臉頰近顎骨位置,有五到六粒超級巨瘡,像藍莓般大小,長在面上。我忍痛用紙巾拿掉它們,很怕裡面的膿會爆出來,每一下都十分小心,又十分痛。我看到鏡裡的自己,很想哭,心想,只不過通了一晚頂,就爛面爛成這樣,人生完了,這樣爛,沒得救。

然後醒來,十分驚慌,連忙摸了摸面,到洗手間照照鏡,發現那是噩夢。不過我臉上的確是長了幾粒瘡,還有些印。那恐懼久久不散,好像還感到臉上在流膿,叫人作嘔。

最近總是受暗瘡的困擾,即使好了,又留下印,印在退時,又長新的。這不是青春的象徵,是荷爾蒙失調的後果。

真是沒完沒了的噩夢。




早幾晚也有其他噩夢,包括回到中學時代,又要再考試,有種「重新來過」的壓迫感。還有夢見自己在黑暗的密室中,一個陌生人突然跳出來嚇到我半死,我在夢裡聲尖叫著,十分可怕。

睡著,或是醒來,都是十分可怕。

Sunday, April 12, 2009

東尼瀧谷


無諗過夜媽媽,電視會播,而我又睇晒。
好唔似電影嘅一套電影,似係慢慢讀返本小說,
配樂令成套戲個空間感、孤單感非常強烈。
唔會話係一套好好睇嘅戲,不過鍾意村上春樹嘅小說,
應該都會鍾意呢套戲。

天煞撞正怪怪獸


幾好笑,
不過點解依家好似迫住你睇3D版?
無咩戲院做普通版?

Saturday, April 11, 2009

Thursday, April 9, 2009

Contax T2 試機 (3)






光圈太大了!
(小山,我會掛念你。)

Contax T2 試機 (2)




啲色錯晒,以後唔去果間曬相!

Contax T2 試機 (1)




甘,唔好郁來郁去啦!同你影靚相呀!

Sunday, April 5, 2009

新宿事件


成龍無打功夫、做黑幫、做殺手、仲有床上戲,唔係唔睇呀?我真係未見過成龍咁真實,雖則演技真係麻麻地,不過算係咁啦,對於佢黎講,拍左咁多年戲,呢套戲已經係好大突破。

我唔明點解反而香港人會唔鍾意佢,因為佢成日扮大哥?因為佢假?因為佢做過好多賤野又唔敢認?因為章子怡餵佢食提子?因為佢同楊受成好friend?因為佢用霸王洗頭水?其實我地香港人見到嘅成龍,比外國人睇到嘅成龍,更加接近真實,佢都係人jer,又唔係聖人。

吳彥祖做得好好,好認真,雖然特登扮老土,不過佢真係扮唔到,始終都係太有型喇;竹中直人、加藤雅都係恰如其份,幾好咁啦,無咩特別;一定要講徐靜蕾,佢真係好樣衰,唔想再見到佢做戲,唔明點解咁多大片都有佢份,真係太樣衰喇,口腫面腫唇黑牙又唔齊,洗唔甩老土村姑味,好想佢消失,完全唔明佢憑咩做黑幫大佬老婆,最慘同場演出有美人范冰冰,一雙水汪汪大眼睛,風情萬種,配日本妹造型真係十分討好,相比起徐靜蕾真係超級醜。

爾冬陞用人真係幾厲害,係「早熟」用房祖明已經用得好精明,到「新宿事件」用成龍都用得好好,知道佢地未必演技好,就用角色去遷就,拍攝手法同劇情搭夠,其實真係好聰明,香港無咩導演可以做到。

成龍大哥你突破左一次,不如突破第二次,不如下次同李安拍戲啦......

Saturday, April 4, 2009

懶人煮食:星期六晚餐

呢碗啡色物體,係我參考食譜煮嘅French Onion Soup,不過一啲都唔french,
其實呢個湯違背「懶人煮食」原則,因為都幾麻煩。
洋蔥3個,切碎,慢火落約3茶匙牛油,
牛油溶晒,落洋蔥炒約10分鐘,蓋上煮5分鐘,
之後落一大杯dry white wine煮,
會聞到洋蔥mix埋酒香,好鬼香,
再煮一陣,keep住慢火,如果唔係好易煮燶,
加少量鹽,糖,
煮10分鐘左右,加入一小盒史雲生清雞湯(吃牛的,可用牛肉stock)
再蓋上,煮20分鐘。

全程約45分鐘,咁上下就可以食得!
如果嫌太濃味,可加適量水,沖淡少少。

其實French Onion Soup之後仲要加麵包上面,再去焗爐焗20分鐘左右,
不過如果咁搞法,真係完全同「懶人煮食」背道而馳得太厲害,
所以我煮完之後就直接食,保持返少少懶人原則。
如果你得閒,你可以試下再焗。


一個咁好味嘅湯,緊係要配麵包食啦!
法包,上面加少少Parmesan cheese,焗15分鐘,
食果時滲落啲湯,索晒味,同埋啲洋蔥一齊食,勁好味呀!
懶人最愛:生蠔(好野!唔洗煮!)
上面細隻:法國唔知咩蠔(一般,得個咸字)
下面大隻:澳洲唔知咩蠔(好好味,好咸,好海水味,又爽口)
真係好正
懶人第二最愛:沙律(又係唔洗煮!)
沙律菜,罐頭tuna,mix埋一齊,加少少黑椒同olive oil,清新好味


(以上嘅生蠔、麵包同沙律都係購於City Super,
其餘材料購於屋企樓下百佳)

Friday, April 3, 2009

懶人煮食:炒粒粒


其實呢個一啲都唔懶,都幾麻煩,因為切粒粒要好多時間!

紅椒、青椒各1隻,洋蔥1個,雞肉一包(各下吃牛的話,可自選免治牛肉)
切雞肉,切到接近免治,一粒粒爛晒咁
再醃雞肉,生抽、老抽、麻油、胡椒,
今次我想食辣,加咗少許桂林辣椒醬
將青椒、紅椒同洋蔥切粒,呢到都要半粒鐘
然後落鑊炒,猛火先炒香洋蔥粒
再落雞肉
最後落青椒、紅椒粒
加大量黑椒(怕辣的話,都落少少去調下味)
期間不停炒,不停炒,炒到手都斷為止(大約15分鐘)
最後上碟食得

因為辣辣地,真係送飯一流!
雖然好麻煩,不過成功咗又好開心!

懶人煮食:蘑菇奄列


蛋4隻,一罐蘑菇,一條雞肉腸切粒
中火炒香腸粒,上碟
落蛋,中火煎,再落埋蘑菇同香腸粒,對摺
上碟食得!

(圖:我呢個失敗咗,爆開咗,哈哈)

幾時先可以試機呢?