Showing posts with label 感恩週記. Show all posts
Showing posts with label 感恩週記. Show all posts

Wednesday, June 5, 2013

5月飛霜

5月,

幾乎沒有記憶發生過什麼事,看看工作桌上的日記,寫得密密麻麻,每日都在工作的繁瑣事中消磨掉。人生,不用文字去解釋的無奈。連續兩個pitch,再加上其他job,持續開夜,開到5月尾6月頭得了氣管炎,好像意料之內的事了。上年差不多這個時候,也是得了很嚴重的氣管炎,咳到幾乎要死,今年沒有那麼嚴重,是否身體曲線地表達「其實我比以前強壯了」?



5月,還有什麼好記?再次紋身,紋了個Hugo頭。花了5個半小時,時間太長,到後來真的好痛,痛到要暈,捱不住,結果玫瑰未能上色,留待下一次。

5月,心裡還有很多七上八落的計算,誰人明白我?工作上的折磨和變遷,令我很想不幹了。但我不幹了,錢從天上掉下來麼?我想休息一下,羨慕那些不用工作的婦人,結婚後為什麼我不能成為主婦?為什麼還貪戀那份人工?到底一切有什麼意義......意義是那麼的難找,比Waldo更難找。任何的可能性,都被我聯想到最差的情況去了,我到底有什麼問題......

6月頭了,還在咳,還在流鼻水鼻塞。通常別人冬天染的病,我就夏天惹上。陽光,海灘,都無緣,周末我在家裡病病病睡睡睡。我沒有朋友了,去到一個地步覺得身體都是負累。

6月,夏至,我很討厭風和日麗的天氣,很討厭暴烈的陽光,很討厭藍天白雲,很討厭一切「開心」的象徵,很討厭要裝開心。我都是比較喜歡天陰下雨打風寒冷,贈你一首I'm only happy when it rains,還有另一句:I'm happy being sad...

Tuesday, April 30, 2013

天灰四月

四月,在持續的雨天、陰天、回南天的潮濕下過了。工作上繼續忙忙忙,一個接一個的挑戰,默默地獨自面對,不斷學習,沒有人會知道你付出的努力,很正常吧,日子還是繼續過,每月還是期特那份糧。

重點,公司春茗去了台北一趟,三日兩夜非常趕,上次去台中也是這樣。第一晚到步已是晚上8時,去到酒店後就與其他同事集合去食燒肉,之後他們去喝酒,我和男人回酒店睡,有點作感冒不太精神,但卻失眠到四點。

第二天早上醒來,食早餐,在西門町周圍逛,一直下著毛毛雨,下午等到其他同事睡醒(喝酒喝到瘋了),去了上引水產吃海鮮。飽到幾乎嘔,回酒店集合,還未消化就要起程去食春茗。幸好是自助餐,所以全晚只是食沙律菜,清一清就快要爆的胃。萬眾期待的大抽獎,我只有百佳現金券三百元和一支SKII男裝神仙水(配方和女裝的一樣),比兩手空空好一點吧。 吃完回酒店,與男人會合,再與其他同事去了一個比較小、比較近的師大夜市,又不停的吃小食。吃完,再買啤酒回酒店大堂邊喝邊吹水到凌晨兩點幾。但回房洗澡後,仍是失眠到四點。

第三天, 食早餐,好喜歡酒店的自助早餐,有粥有沙律菜有蛋有多士,有咖啡有橙汁,非常豐富。食完不久後就要check out,然後去看好朋友和剛出世的BB!第一次去台北,就去了參觀非常漂亮的醫院、非常舒適的坐月中心,像酒店一樣,香港有這種服務就好了。一直非常
掛住的好友終於見面,聽著妳分享生產經歷,有點頭暈,做媽媽真的很辛苦!幸好妳休養得好好,看上去很精神還年輕了。隔著玻璃望BB,好可愛,希望你健健康康,快高長大!短短一聚,臨別很不捨得啊,不知何時再見,在門口道別時只差半秒就會哭了。妳為人媽媽了,我還是個白痴幼稚的細路!哈哈。

臨走,去了台北101一趟,做個「到此一遊 」的遊客,吃了個午餐,再去附近那間很大的誠品。雖然香港都開了, 但作為遊客,始終要去「到此一遊」一下。之後,就回酒店取行理,打的去機場了。三日兩夜像發了個夢般快就完了,非常充實,很多好吃的,下次想再來留多幾天,去北投溫泉或去陽明山。

星期日晚回到香港,星期一就立即工作忙忙忙,人都癲。四月就是這樣完了。

Sunday, March 24, 2013

劉感恩

日子過得有點慢,很多事沒法預計。有些事可以等,可以慢慢再算;有些事正在蘊釀,讓人無奈地接受和等待;有些事,關我事或不關我事的,都不能說。

越來越討厭某些人或行徑,很細微的,細微到我都無可能說出口,只能納悶在心裡,無人知道。我總是在想,為什麼人有這個、這個、這個和這個心理,我開始覺得我不太了解人心,不太懂做人,好像做什麼都是為了讓別人看得舒服、說什麼是為了讓別人聽得順耳,那我自己真正的想法又如何?在這個社會裡,都是要裝開心、扮正常的去過活。間歇性的自閉傾向又浮出來,不再面對人,但不可能。

好消息,好朋友順利誕下女兒,母女平安,感恩。身體不好,經常病,但幸好不是病得太嚴重,能勉強著,或者抵抗力其實已有進步,也要感恩一下。

未來一星期繼續天陰有雨,心情大概也是如此。

Tuesday, March 12, 2013

劉感恩

有關工作,無端端一個消息,太突然,呆了一晚去思考這件事,其實沒什麼大不了,很平常的事,只是工作中牽涉了些少情感,一下子實在未能接受未來的轉變。第二天上班,那段路、那扇門、那張桌子、那個位,幾乎每日都對住的東西,突然又好像變得有點不一樣,不知如何解釋。改變或者是好事,我也沒有什麼可以做,只能更努力,努力去適應。接受和適應,都是時間的問題而已。

Monday, March 4, 2013

劉感恩

身邊的朋友,有好消息,也有壞消息。

好消息呢,有人就快產女,就快做媽媽,踏入人生另一階段,連我也緊張起來,心裡一直期待寶寶的來臨。也有朋友「被求婚」,恭喜恭喜,從此得到有另一半共度一生的幸福,不用再擔心你。見到朋友們都幸福,非常感恩,大家一起由年輕到現在已是中女了,努力過那麼多,經歷那麼多,希望我們日後「中女」的日子能美滿幸福,能享受屬於自己的家庭樂。

壞消息呢,小時候的朋友一家人,是上星期六北角墮lift意外中的傷者,朋友是「危殆」傷者其中一個,他的老婆、外父外母全家一同受傷。他父母只有他一個兒子,意外後慌慌張張在醫院等候。星期日早上去了瑪麗醫院一趟,幫很小很小的忙,作用不大,但如果能安慰他父母一丁點、能讓他們安心一丁點都好,都已經足夠,突然發生這意外,實在不知如何是好;見到床上重傷的朋友心裡很難受,幸好他一直清醒,而且還可以移動身體。我只想重傷的一家人快點康復,祈求上天幫助他們一家。意外很嚴重,無助的我們只能祈禱。

另外,自己老公本身不認識那個朋友,沒有見過,但都樂意幫忙,走來走去做司機沒有半句怨言,又令我覺得自己嫁得好,因為他是個善良、不計較的人。(嘔)

另另外,我又發癲,狠狠地買了我不該買的東西,貴到飛起,但買完之後很快樂。
但我再看看銀行戶口,又立即不太快樂,直頭有種「被削肉」的痛,說到底我都是孤寒怪。未來一年我不能再買任何東西了,要狠狠地實行孤寒怪儲蓄計劃。(滴汗)

Thursday, February 28, 2013

劉感恩

新年前,一直忙忙忙,忙到最後一刻,年28收爐都不是太早收。 
新年假期,轉眼即逝。一星期真的不夠,沒有休息夠,就又要開工。期間一直傷風,喉嚨痛又流鼻水,以為放假自己休息下食下成藥就會好,但一直都沒好過,最後都是要看醫生食西藥,失敗!可能新年間一直沒有戒口,熱氣東西照食,又晚睡,病不會好都好正常。 

婚後第一個情人節收到花同禮物,好開心,彌補了聖誕節的hea,哈哈。但其後又覺得很花錢,很貴!情趣心思都是要錢?其實在家中煮一餐簡單飯、一張卡我都很開心很滿足了,今次情人節當收bonus吧,謝謝。 

新年後,第一日已經開會開幾小時,繼續忙忙忙。每日都有萬千瑣碎事煩擾,但那些都是工作、生活的一部份,逃不了。有時無聊看看自己桌面上的月歷,紀錄了過去接近兩年的工作,過了一關又一關,納悶著,還有幾多關要過? 

沒有感覺的生活著,唯有看好書,對腦袋做下按摩。最近看Malcome Gladwell的書,從不同角度看尋常/不尋常事,需要別人的智慧來啟發我,給我少少精神力量。學習+思考,就是最好的娛樂,從來都不悶。

朋友們,有時我都會掛念你們,我在想,這些日子大家都在忙什麼?我們這個年紀的人,都在忙什麼呢?

Tuesday, January 1, 2013

2012 - 2013

終於來到2013年。

12月過去,很不情願地回想婚禮當日,總是覺得「多了」,如果可以再選擇來多次,我會堅持只是兩個人穿著便服,安靜地去簽個名就夠,其他一切都是令人吃力疲累,我太討厭儀式,討厭化濃妝著婚紗,討厭被那般麼多人望著的感覺。但是,見到那麼多的親人朋友聚首一堂時開心事,特別是從外地飛回香港的朋友,見到你們很感動。始終,世上大部份人都是喜歡熱鬧,是我太宅或自閉,年過30之後,我越來越想自己能夠隱形。

大婚當日,兩個人,硬著頭皮,就這樣衝了過去。當日落淚,都是開心的淚,但也有部份是「救命我已經很累請快點完結我想回家自己靜下唔好搞我」的淚。之後,就是法律上的夫妻,感覺很奇怪,跟別人談起,到現在還改不了口繼續說「我男朋友.....」仍未能說出「我老公」或「我先生」,明明是名正言順,但偏偏感覺尷尬,是不是我下意識根本很抗拒?!再計一計數,花了很多錢,肉赤,因為覺得花得不夠開心,那些錢,可以買一個靚手袋,去一次歐洲旅行,這樣花錢更加開心。

之後放假放了兩星期,都是吃、睡、玩,因為有了車,可以和Hugo周圍玩下,然後又開始工作,繼續無聊生活,工作上又有獎,開心,但沒有可觀獎金或年尾花紅,不是太開心。另一個highlight是,終於等到Les Miserables電影上映,心情激動地看了一次,其實很想再看多次,但提不起勁。天氣凍,又經常天陰有雨,大部份時間只想睡覺。

聖誕節,又是斷斷續續地吃、睡、玩,假期後肥了。除夕留家休息,悶悶地過,其實我喜歡這樣悶,只是Hugo有時太煩經常騷擾人,不讓人好好休息令人心煩。

2012年,行動的一年,做了3件大事,完結了。

2013年,又是另一個開始,又再準備計劃下。


Sunday, November 18, 2012

劉感恩

十一月是我的生日月,生日正日前兩日,原本請了birthday leave,男人訂了位去ICC食飯,但,突然又感冒,又病!又頭痛又鼻塞又鼻水,頭痛痛到癲,因為鼻竇腫脹連臉頰都痛,非常辛苦,結果飯吃不成,變成吃藥,睡足一天,連男人準備的禮物,都無精打彩下收了。我想快點病好,因為第二天就要連續shoot兩日,太病跟shoot會好辛苦。 第一日病住shoot了半天,第二日生日正日,shoot了一整天,當中有個break能回家洗個澡小休一障。生日正日的晚飯,是自己一個食飯盒。不能說是淒涼,只能說很無奈。 或者上天可憐我,其後為我彌補,哈哈,原本都沒有特別慶祝,但因為要派帖,順便和不同的朋友們食飯,而朋友們都很貼心,在我最後一個單身生日給我買蛋糕慶祝。今年吃了三個+一件生日蛋糕,老細又給我大利是及生日卡(還語重心長寫了一番勉勵說話),真的非常感激和感動。 然後,發現時間突然過得很快,十二月前有兩條片要出街,令我工作上「充實」到頂點,精神上身體上都覺得累。到我發現離大日子不遠時,就覺得有點緊張。 最近思緒都容易亂,能隨時跌入回憶中,或陷入對未來的一片茫然。有時,覺得自己還是20歲般衝動天真自我貪玩又白痴;有時又覺得,自己已經七老八十,身體差精神衰弱,好多事都看化覺得無意義不想執拗反正我都看你不順眼我寧願自己默默收皮活在自己殘陽山落的世界中與你各不相干。 十二月,快點來吧。

Monday, October 22, 2012

劉感恩

忙忙碌碌咁,又過咗一個星期,無做過咩特別事,工作上繼續痛苦。但上星期為自己「心理補償」咗,狠狠地出咗一鑊血,買咗一直令我心痕痕、瞓唔著嘅寶貝,戀物狂繼續戀物,又要繼續努力搵錢。

 基本上,紅牛皮的確比較適合小一號嘅medium,試上身係完美嘅,試jumbo反而真係覺得太大,加上紅牛本身好搶,用過之後,我真係覺得medium好睇好多,感恩最後都有貨。因為擁有咗第一個medium,令我更加想要多啲細少少嘅袋,不求實用,但求好睇。細Reissue同Constance越睇越愛,我又要為自己搵下一個目標,作為我唔可以辭職、要繼續努力工作嘅推動力,幾攰都好,都要頂住。 

一直等待12月快啲來,快啲過咗果一日。婚禮嘅事煩,唔係因為件事麻煩,而係啲人麻煩。我想快啲完,快啲放假,比我一個人靜靜地過一陣,唔好煩我。



就係為咗兩餐飯同埋茶花,每日辛勞。

但我只想每日弄狗為樂。

Monday, October 15, 2012

劉感恩

工作上,對上兩個星期,幾乎都無搭地鐵放過工,晚晚都係凌晨搭的士,感覺接近絕望。一來,身體上攰,唔係好夠瞓;二來,心理上攰,因為太多因素......點解啲嘢好似無盡頭咁?我見唔到有完嘅一日,一個完咗,又有另一個,人有限,job無限。每日返工,都問自己一句:「為乜呢?」為咗份糧,無晒生活,值得咩?連人生大事都已經無晒mood同無晒力去搞。


我想結婚後做師奶,呢個慾望從來都未試過咁強烈。 

好攰,終極攰。


剛剛個weekend,過咗大禮。熱熱鬧鬧,快快趣趣,都搞左半日。屋企人順便比我睇下,佢哋送咩嫁妝比我,感謝屋企人嘅厚愛,其實之前我多次同父母講,唔洗買太多嘢,唔洗太多金器或珠寶,講到明唔要鑽石手飾,但爸爸最後都係送咗,仲有阿婆留下來兩隻金呃,非常感恩。

帖印好喇,終於,又少一樣事煩,感謝身邊另一半,喺我忙到PK時,佢幾乎做晒所有嘢,有擔帶,有分數,係無錢。哈哈。




Tuesday, October 2, 2012

劉感恩

2012年係「行動之年」,我諗得出,就要做得到;今年,拿獎(雖然只係銅獎但好過無啦),養狗,紋身,結婚,只要想,就去實行,如果今年真係世界末日,咁我都了咗部分心願,無憾。未來,我想睇中醫,搬屋,養多隻狗,同埋辭職唔做,哈哈哈。我要努力啲去搵辦法實現我嘅目標......只係時間遲早問題,我對上天祈求,比多少少耐性同能力我,我想做自己想做嘅嘢,過自己想過嘅生活。 但所有事都有代價,拿獎背後是長時間工作,養狗就無咗自由多咗責任,少出街唔去得旅行連honeymoon都唔想去,紋身痛足3小時肌肉都痛埋,結婚係要花錢同埋煩惱無數事......但我仍然滿足感恩,唔易捱都要捱過去。

非常期待下一次,我想整腳。

任何日子,唔止節日,同朋友們食飯飲嘢吹水、同屋企人食下飯都好開心。

放4日假long weekend對住呢隻嘢仲開心。

Sunday, September 23, 2012

劉感恩

上星期攰到終極,加埋M到,更加攰。越來越厭倦做緊既野,但無辦法,忍落去,捱落去,年尾放個長假休息下,到時再算。每日瞓醒都唔想返工,唔想面對漫長既一日......我唔想開夜呀......好攰,覺得無人明呢個感覺,無私人時間,無生活,無咗好多時間,但又唔見得著啲乜。越來越討厭身邊所有人,覺得太多人都太虛偽,每日都要應酬呢啲人,好攰。或者我要放棄成日講笑既作風,或者要創造一個孤僻既風格出來去避開所有人。太多人,太多事,覺得自己變透明都係一件好事,變成透明之後,人地就唔會再來煩你咁多,你存在與否都唔再重要。

唔好怪我成日買野,買野係我唯一減壓方法。 

放假太攰,只能瞓瞓瞓,真係瞓足全日,夜晚去食飯或放狗先落下街;感恩兩日都有住家飯食,有啲湯飲下,感激。

Monday, September 17, 2012

劉感恩

上一轉嘅片出咗街,共4條片以奇蹟嘅schedule同budget去完成,真係難以置信,感恩出來之後唔係太差,但都未來得及消化下、休息下,已經要開始做另一個job,繼續開夜,繼續辛苦。所有事,都係因為人嘅關係而變得複雜,煩到爆。而經過咁多教訓,我都仍然未能學識點樣應對「人」嘅關係,只係逃避,負面感覺無限擴大,唉,好難唔會灰心。我只係唔想好似以前咁,因為其他「人」而影響自己決定。實在有好多嘢要繼續學習應對,真係好攰,同埋覺得好勉強自己,但又實在無辦法,世事總不能盡人意。

兩星期前去咗狗友屋企食飯,只能用「正」來形容。

星期六與一個同樣12月結婚嘅舊同事一齊去咗試裙,睇下又玩下咁,終於揀到款,但下面post出來嘅款都唔係最後選擇嘅款,試來睇下效果玩下。

星期日同Hugo去咗沙灘玩,清涼又有陽光,非常舒服,減壓減壓,見佢玩得開心,自己都開心。

Tuesday, September 4, 2012

劉感恩

上星期,又病又忙又攰,星期二晚捱住病開夜跟shoot,坐係街邊又熱又焗,就快暈,去到凌晨頂唔住要走先,星期三真係正式收皮sick leave係屋企瞓咗全日,直頭接近昏迷式瞓。星期五原本係公司假期但又係要做野,星期六係屋企做野做到凌晨3點,瞓4個鐘就起身,星期日由晨早shoot到凌晨,好多人仲瞓緊覺時我就出門,到我收工回家時好多人又係瞓緊,坐係個工場裡面坐足17個鐘,成個人由外到內、成個鼻同喉嚨都係塵,腰骨痛到嘔,眼乾到爆。 真係辛苦,我都唔想成日呻,但我真係無咩體力長做落去,後生時都已經無咩精力,依家過咗3字頭一唔夠瞓同壓力大就更加攰上加攰,無力,成日都有想唔做野既念頭,咁辛苦為乜,人工又唔係高。 最慘係,唔會有「忙完」既一日,由依家到年尾都大把野做,唉!人生大事都無時間去做喇!

星期一係完全唔夠瞓、無精神既情況下,食左一餐生日飯,銅鑼灣翠園好食,Cova Tiramisu都好食,九月有大把生日之星,希望有口福。

Sunday, August 26, 2012

劉感恩

唉,好攰,唔明自己份工點解咁戇居,時間長,壓力大,月薪少,點解呢,為乜呢。好煩,某啲人好煩,更加唔明點解某啲人可以咁他條、咩都唔理坐喺度就有高薪,做高層真好,難為我哋做細嘅,咩都要我哋搞晒,你得閒講一兩句廢話就得,又lead唔到我哋一team,成日都唔知做乜。好攰!好厭!好煩!想辭職!最多以後唔買嘢......淨係買股票.......(淚)

 星期五晚送別西門兄之飯,因為要睇props搞到遲到兩粒鐘,搭的士又唔記得拿單!真係趕頭趕命氣都無。 不過wooloomooloo prime環境真係好好,嘢食都好好食(唔知係咪因為我太餓),我想下次再去,情況唔係趕頭趕命、無工作煩惱之下慢慢嘆......西門兄,唔知幾時同你可以再飲下sake或者martini,下次見面已係12月之時,哈哈,希望你去到果邊一切順利。
星期六因工作關係又要出去搞一輪,為咗心理補償,開工前去咗中環文華 Cafe Causette high tea,平時都無呢個喜好,只係純為彌補一下,始終我都係喜歡食咸多過甜嘢,食物ok,選份量少啲,價錢甚至比出面某啲餐廳平,好抵食。喺中環順便去去巡下「我啲鋪」,平時根本無時間行街!見到我想買嘅嘢,然後因為太貴死咗條心,算數喇,我死心喇,以後想要,就上網睇算喇。(淚)

Monday, August 20, 2012

劉感恩

星期五係男人正日生日,去咗Harlan's慶祝,望住維港景懶浪漫。
雖然肉赤,但非常之好食,三式鵝肝同埋黑松露汁廿手摺通粉,強烈推介。

 

星期六晚同朋友們慶祝其他「8月之星」生日飯,
去咗尖東一間好多日本人去嘅居酒屋Hokahoka,ok啦,串燒同刺身最好食。
成班人熱熱鬧鬧,坐榻榻米,感覺隨意舒適。

一個蛋糕,三個名。食埋呢個終極甜品,真係飽到上心口。
 

除咗飲飲食食,仲好productive,花咗兩日下午,完成咗四幅畫,減壓良方。





Monday, August 13, 2012

劉感恩

今個weekend同班狗友玩得盡興,先係星期六上去人地屋企打邊爐,主人家超有心機整好晒、買好晒所有野食,非常正!食足4小時,一路食野、一路飲下啤酒、一路吹水,咁就水到凌晨一點幾,飲飽食醉返屋企,非常高興,大家都少放狗一晚。

星期日中午同屋企人飲茶,雙方家長會面,緊緊張張咁就過左關。
之後同Hugo去汀九近水灣游水,成班狗友一齊去,玩左兩個幾鐘,攰到無力,Hugo都盡興,返到屋企攰瞓到死豬咁,哈哈。希望遲啲有機會去珀麗灣果邊玩。

Hugo同小肥形影不離。

Monday, August 6, 2012

劉感恩

最近都係做嘢煩,壓力大,另外自己嘢又花左好多時間去做,瞓得好少。
 但有時我諗,我都想要多啲freelance jobs,當多啲「零用錢」比我去買嘢。
物慾無窮!真係要回頭是岸!淨係留連係ASOS同Topshop兩個網,都無左幾千蚊,淘寶果啲幾百蚊我都費事計。


星期五去左無冷氣既Marilyn Diner食飯,好食,抵食,
但真係熱到想死,如果冷氣大返少少會好好多囉。
特別呢一個星期都因為打風而焗到抽筋......之後約左個artist見面,我期待下一次inked。



從前我好討厭唇膏,但最近對呢樣嘢欲罷不能,想買齊咁多種色,包括lip gloss。自從病左好返之後,個人無咩血色,發現擦少少唇睇落已經好唔同,唔,我覺得自己正式成為老女人。因為我覺得只有老女人先鍾意擦,哈哈。

Monday, July 23, 2012

怒

怒,奴役,在心上,所以怒。也說明了最近工作上的心情,放棄的念頭又再出現,何苦要一直奴役自己的心?何苦一直要怒?唉,但仍未到最後一刻,還是要學習「心不動念,以忍止諍」。 工作上太多不快事,算了。感恩我的咳終於有好轉,接近斷尾,但仍不敢接近凍飲或煎炸食物,相信仍要戒口一段時間。最開心能與「譚太」和西門過一個happy friday;星期六又出去飲飲食食再看The Dark Knight Rises;星期日又食餐好;好朋友經檢查後知道身體健康。很多好事發生,還有什麼好抱怨?


但心情真的不好。是不是下雨的關係?我只想躲在床上睡,不想見任何人。對現時的生活,感到很厭倦。

Sunday, July 15, 2012

又病

咳
咳
 咳 

咳到甩肺,咳到反胃,一咳就停唔到,由朝咳到晚,夜晚咳得更加勁,咳到就快人都癲。五月頭先重感冒一次,依家七月中又支氣管炎,我都想知自己到底咩事,有無咁弱雞,有無咁易病?明明飲食都好小心又有適量運動,點解都係咁易病?仲要又係病得咁甘!我都未試過咳足一晚通宵無瞓過,咳到個肚都痛,都未試過咳得咁厲害!

病到咁,有時覺得好無助,有苦自己知,人地都幫唔到你啲咩,咳得最辛苦時真係想有人安慰下,沖杯熱水來飲下都好呀,掃下背脊都好呀,雖然無實在作用,但都好過自己一個戇居居喺屋企咳咳咳。病,真係好折磨,病到心情都低落,好返之後一定要做多啲運動,要努力。

上星期作病前weekend其實好過癮, 星期五晚已經又食又飲,唔知係咪咁樣出事,又食熱氣野又飲酒夜瞓,身體可能本身都作病,幾日又玩又食就爆出黎,真係攞命,早知唔食咁多咖哩雞呀、椒鹽瀨尿蝦呀,我次次都忍唔到口出事。

上星期六book咗studio又影多次engagement photos,哈哈。第一次影果次係outdoor熱到癲,曬到燶,吸取教訓所以今次玩indoor minimal,喺studio有冷氣舒服好多;感恩有兩位朋友幫手影相,同埋朋友老婆幫手免費新娘化妝set頭,無盡感激,過程都好玩,影咗勁多kai相,哈哈。全程都係著兩條裙,一條上次outdoor果套,另一條係婚紗,全部都係淘寶貨,影相其實真係OK,又平又抵玩。淨係影engagement photos前前後後都揾咗4個人影,全部免費,又好玩,感恩身邊嘅朋友都仗義幫忙。



遲啲要開始執相,大把相執,其實係咪要請假當job咁做,哈。

上星期日同Hugo豬去玩水曬太陽,見佢係沙灘跑好開心,我又開心,Hugo豬喺我咳得最辛苦、眼水鼻水一齊流時會來睇下我咩事,會錫下我隻腳,好似知我辛苦安慰我,真係乖仔呀,夜晚比我咳聲嘈住無覺好瞓,希望你日頭瞓返夠啦。