Showing posts with label 出去飲飲食食. Show all posts
Showing posts with label 出去飲飲食食. Show all posts

Sunday, August 26, 2012

劉感恩

唉,好攰,唔明自己份工點解咁戇居,時間長,壓力大,月薪少,點解呢,為乜呢。好煩,某啲人好煩,更加唔明點解某啲人可以咁他條、咩都唔理坐喺度就有高薪,做高層真好,難為我哋做細嘅,咩都要我哋搞晒,你得閒講一兩句廢話就得,又lead唔到我哋一team,成日都唔知做乜。好攰!好厭!好煩!想辭職!最多以後唔買嘢......淨係買股票.......(淚)

 星期五晚送別西門兄之飯,因為要睇props搞到遲到兩粒鐘,搭的士又唔記得拿單!真係趕頭趕命氣都無。 不過wooloomooloo prime環境真係好好,嘢食都好好食(唔知係咪因為我太餓),我想下次再去,情況唔係趕頭趕命、無工作煩惱之下慢慢嘆......西門兄,唔知幾時同你可以再飲下sake或者martini,下次見面已係12月之時,哈哈,希望你去到果邊一切順利。
星期六因工作關係又要出去搞一輪,為咗心理補償,開工前去咗中環文華 Cafe Causette high tea,平時都無呢個喜好,只係純為彌補一下,始終我都係喜歡食咸多過甜嘢,食物ok,選份量少啲,價錢甚至比出面某啲餐廳平,好抵食。喺中環順便去去巡下「我啲鋪」,平時根本無時間行街!見到我想買嘅嘢,然後因為太貴死咗條心,算數喇,我死心喇,以後想要,就上網睇算喇。(淚)

Monday, August 20, 2012

劉感恩

星期五係男人正日生日,去咗Harlan's慶祝,望住維港景懶浪漫。
雖然肉赤,但非常之好食,三式鵝肝同埋黑松露汁廿手摺通粉,強烈推介。

 

星期六晚同朋友們慶祝其他「8月之星」生日飯,
去咗尖東一間好多日本人去嘅居酒屋Hokahoka,ok啦,串燒同刺身最好食。
成班人熱熱鬧鬧,坐榻榻米,感覺隨意舒適。

一個蛋糕,三個名。食埋呢個終極甜品,真係飽到上心口。
 

除咗飲飲食食,仲好productive,花咗兩日下午,完成咗四幅畫,減壓良方。





Monday, August 6, 2012

劉感恩

最近都係做嘢煩,壓力大,另外自己嘢又花左好多時間去做,瞓得好少。
 但有時我諗,我都想要多啲freelance jobs,當多啲「零用錢」比我去買嘢。
物慾無窮!真係要回頭是岸!淨係留連係ASOS同Topshop兩個網,都無左幾千蚊,淘寶果啲幾百蚊我都費事計。


星期五去左無冷氣既Marilyn Diner食飯,好食,抵食,
但真係熱到想死,如果冷氣大返少少會好好多囉。
特別呢一個星期都因為打風而焗到抽筋......之後約左個artist見面,我期待下一次inked。



從前我好討厭唇膏,但最近對呢樣嘢欲罷不能,想買齊咁多種色,包括lip gloss。自從病左好返之後,個人無咩血色,發現擦少少唇睇落已經好唔同,唔,我覺得自己正式成為老女人。因為我覺得只有老女人先鍾意擦,哈哈。

Wednesday, June 27, 2012

六月之「食」

六月其實好多飯局同節目,親友生日,父親節,舊同事婚禮......所以食咗唔少好嘢,感恩有咁多機會同咁多人一齊飲飲食食。



呢個生日蛋糕,真係同生日果位朋友襯到絕!見到真係大笑!

淺水灣婚禮真係浪漫,新娘好靚好高貴,地方又有格調,羨慕!食物同酒都不錯,龍蝦湯好好味,但因為頭盤一舊鵝肝就飽到上心口。

舅父生日飯+父親節飯,又去咗小南國,哈哈,今次叫套餐麻麻地,但個撈麵仍然咁好食,再加個blueberry cheese cake做生日蛋糕,好滿足!

另一餐住家父親節飯,叫外送海鮮,又抵食又好味,我真係好愛麵包蟹!啲蟹膏多到食完第二日即刻走去gym做運動!

出去食得多,終於有個週末唔想出街,加上天氣又係天陰有雨,更加只係想喺屋企食食食同瞓瞓瞓,真係可以攬住Hugo瞓足大半日!同佢一齊午睡嘅時光真係好幸福......然後夜晚落街散步又係好幸福......Hugo成功做咗絕育手術,又話會乖啲,唔知點解越來越百厭!但無損我對法國老虎狗嘅鍾愛......更加想要多一隻米色嘅......"Frenchie is like chips, you just don't have one."好貼切嘅形容。
喺屋企無咩嘢做,就煮下飯。因為平時帶便當成日食飯,食到有啲厭,所以weekend煮西餐!食牛嘅就食牛扒,唔食牛我就食烤三文魚,百佳好平果啲三文魚塊原來調好個汁去烤其實都好好食,同埋好耐無整嘅薯蓉都成功,好飽。


呢個係芥末忌廉汁三文魚加牛油磨菇,其實仲有意粉伴食。
下次我想試下整法式芥末蛋。

同食無關,無啦啦收到禮物,開心,做咗咁耐嘢終於有支似樣嘅筆用。

Sunday, May 27, 2012

劉感恩


感謝上天上星期整個星期都可以早收工!那我才可以每天都能回家食晚飯放狗!非常少有的悠閒,但卻感覺十分充實,放狗、做便當基本上消耗了很多精力和時間,希望一直都可以維持這種生活喇...... 星期六媽咪正日生日,去了小南國食飯,充滿「驚喜」的生日飯,有神秘嘉賓又有禮物,哈哈。 食物很好,每碟份量少,所以可以叫多點,整體上非常好吃。


還有最後一個驚喜,好好味的朱古力mousse蛋糕做甜品,非常飽,非常滿足!

Sunday, April 22, 2012

劉感恩之拍照日

上星期一至五幾乎天天都下著大雨,人都癲,一下子又變得又冷又濕,完全沒有春天的感覺。天氣那麼的鬱悶,終於捱到星期五,晚上與家人去中環證券商協會會所食飯,送別一位與我同年紀、住在美國的表姐,中菜有家常菜的感覺,不錯不錯,而且不貴很化算;
但我們實在叫得太多,食完飽到肚子快要炸開!

很多個雨天之後,星期日終於放晴,而且是萬里無雲那種晴,懷著緊張心情,我們終於去了影所謂的婚紗相,哈哈。 對於「被影」我們總是有點猶疑和不自然,覺得擺任何pose出來的效果都是很kai(因為我們根本就很kai)所以很多時候一拍照我們就是很呆很硬。 但和朋友們幫我們影,感覺其實很causal,很隨意,沒有那麼大的壓力,他們也知道我們喜歡的style,沒有那些硬膠pose和強作快樂的表情,主要都是snap shot feel同埋兩碌木呆企feel,哈哈。 

上午先去迪欣湖,怎料當天有龍舟賽士(下?),很多人,有點不安。我們找些少人的地方影,大量樹木和草地的自然環景,藍天的襯托下非常令人興奮。一路影影影,行到一半我已經有點中暑的感覺,要休息停一下,然後返回入口附近的草地繼續影。因為真的太曬、太熱,我幾乎忙了香港夏天可以這麼的熱,大家都怕我之後沒能量去其他地點拍照(主要是我的問題,其他人的體格都比我強,救命!真羞家!)要為我留力所以到中午就停了。 

 然後我們去迪士尼酒店(冷氣過冷河!)吃下午餐,小休一會,在酒店內又拍點照,很快又步出戶外,在酒店出面一個海旁走廊影。影完都三點、四點左右,接著去東涌炮台,一個隱閉但其實很近馬路可以泊車的古跡,換便服繼續影。

 去到炮台已近傍晚,我們幾個人走進樹林中影相,簡直就是五星級的蚊buffet,任食唔嬲,儘管我們幾乎用光蚊怕水,但蚊還是很多、很強,真的嚇死我,所以逗留不是太耐我們就走了。 整個過程都是輕鬆愉快開心的,感謝為我們拍照的朋友們,願意將一個寶貴的星期日,在烈日和蚊咬下度過,真不容易! 而經過整天暴曬,我的兩個肩膀都曬傷了,紅到像午餐肉一樣!真的很痛!手臂也曬出兩道紅痕來,下星期應該會脫皮......我們怎料到四月都要帶太陽油呢? 唯有之後塗蘆薈......

其中一些未經後期處理沒有re-touch的相片

影完很累,回家洗澡餵狗後,晚上出去尖沙咀Marco Polo的夜上海食飯,食物不錯,比傳統上海菜少油和精緻,今個星期真的很有食神。

Hugo豬豬長大了不少,星期六朋友順路上來探牠,與牠玩了一會。看著牠天天長大,周圍瀨屎尿次數越來越少(雖然都有),牠應該慢慢適應,快樂地長大起來吧?但牠真的很百厭,正宗百厭仔經常搞破壞,我好想牠快點打齊針,然後可以天天帶牠出外去散步,不用呆在家中搞破壞,放假又可以帶牠去玩,夏天一齊去游水。你快點快高長大!健健康康呀! 

見到你就開心

Sunday, January 8, 2012

劉感恩

甘甘走了一星期多,現在才能真正平伏下來。自牠離開的整個星期,我都睡得不好,很累,但造很多超古怪的夢,夢中去了很多超古怪的地方,醒來好像沒有睡過一樣;有一晚夢見甘甘,在一灘水上牠站著洗臉,但一如以往牠的腿讓牠站不穩,牠跌下來就跌在水裡,我就很擔心牠的毛毛濕了,忙著幫牠抹乾,彷彿要在夢裡重覆之前照顧牠來讓自己滿足。

很累,但工作上剛巧有些「非常重要」的事要做,不容有失,唯有死頂著。我假裝得很好,若無其事每日繼續嘻嘻哈哈,過去一星期不同的人都問我牠的身後事怎樣,我次次都有條理地回答,而且還經常將甘甘掛在口邊,笑臉迎人;有人問我,不介意談起這傷心事?我OK嗎?我當然OK,這是唯一的管案,難道在你們面前哭嗎?總有些人以為你笑笑口就沒事。我哭到有四個眼袋出來,難道又要讓人看嗎?今次的事,令我明白自己的掩飾技巧更進一步,我不想出醜或其他人擔心。我最傷心的時候,大概只有一個人看到。

過去那個星期,獨處時仍不能自拔地,像有癮一樣拿著電話不停重看甘甘的舊照,只要一想起牠臨別前的樣子,牠怎樣斷氣的樣子,我怎樣能感到牠快要離去,又想想過去一齊生活的日子,就難以控制地獨個兒流眼淚,但的確,時間能令眼淚減少。牠單獨陪伴著我人生中很重要的8年時間,牠離開後,剎那間像受到一個打擊,只感到自己心態上老了一大節(是否也在哀悼那8年的青春?無從知否)。但無論如何,最後都是轉化為正面的力量,人生是不斷的失去和道別,更要珍惜眼前擁有的一切。感恩在我卑微的生活中,在最傷心時我不感到孤單,有朋友們的安慰,有另一半互相依付。


買了個新書櫃放在客廳,又大又白好好看,而且有一格成為了甘甘的靈位;
安置好後,我的心定了很多。


然後,地球如常轉,日子繼續過,心裡少了一忽肉,就在口裡去找回滿足;甘甘走後的一星期,也就是牠「頭七」那一晚,決定要高高興興和朋友們出去食個飯,飲點酒。


周末都是和屋企人過,提早團年,順便和爸爸賀生日。星期六回家食,打下越南麻雀幾過癮。
星期日出外食,去了尖東海景酒店的中菜餐廳海景軒,好食。





再加多個帝苑餅店買的生日蛋糕,周末飽飽地完結,又要開始另一星期辛苦工作!努力!加油!

Sunday, September 25, 2011

哎喲

持續開夜,今個星期將會繼續呢個無間地獄,因為太攰,好多嘢都無寫低,心裡9成都係煩公事。然後剩下果1成,就煩私事。上星期週末出咗去玩,食咗餐好味嘅意大利嘢,又有得去玩飲下啤酒吹下水,幾開心,而且又多一個朋友有喜事,都覺得開心嘅。今個週末就因為太太太太攰,留喺屋企煮下飯就算,實在太耐無煮過正常嘅一餐(有飯有餸有湯)清茶淡飯最啱唔夠瞓肝火盛嘅我。自己第一次煮咗個「白酒煮蜆」,酒味太濃但都OK,好彩洗得乾淨無咩沙。另外一個「香煎三文魚腩」就失敗喇,我始終覺得熟嘅三文魚好腥,要加大量檸檬汁,但結果又太檸檬味,早知唔整。


另外,唔,其實我發嘅脾氣真係極之無聊,點講都係我太苛刻高要求臭脾氣,其實一啲都唔關其他人事。
我想講,其實問或唔問,用何形式問,我都一早都決定會一直留在你身邊了。我係一個超麻煩嘅人,而身邊有一個一直遷就、體諒同支持我嘅人,我心存無限感恩。



Monday, September 20, 2010

劉感恩

1)做咗檢查,飲咗杯茶,等報告,有點緊張,感謝滴滴陪我,見到我緊張的西樣。

2)上司阿姐辭咗職,恭喜她找到新的出路,雖然工作環境將有變動,感謝有這麼一個令我學習隨緣的機會。

3)某程度上我喜歡做後期,一來因為不用坐在公司,二來有時會同有趣的藝人合作,今個星期第二次與蘇玉華合作,她令我知道「專業」和「友善」是可以合體的。

4)嘗試學習、而且實踐了「心要寬」。盡量不去生氣,是最好的事。

5)狠狠地食了餐爐端燒,算不錯,燒雞翼和雞腎真的幾正,還有海鮮都OK,食和牛的人也有讚。http://www.openrice.com/restaurant/sr2.htm?shopid=22643

Sunday, June 6, 2010

包裝很重要

有啲餐廳,未必好好食,不過地點位於旺區,有靚風景,
再加上靚裝修,如果食物唔係太難食,已經贏咗一半。
iSquare 30樓嘅《南海一號》就係呢種餐廳。
食物普普通通,唔係難食,又唔係好食,
不過勝在裝修正,氣氛好,又有無敵維港景,
一班朋友去食飯慶祝生日,都ok嘅。


小籠包,我無食呀,不過見到包裡好多湯。

蝦蟹肉蒸蛋白,唔係好食到蟹肉,
蝦肉又唔覺新鮮,只係蒸得幾滑送飯幾好。

唔知咩雞煲,雞肉都係普普通通咁,真係無咩特別。

呢個蕃茄,睇就可愛,食落又係非常普通。

排骨,我無食,其他人comment又係一般啦。

金銀蛋菜,正常。

龍蝦湯飯,食唔到龍蝦肉,不過啲脆卜卜米通就幾好味。

魚湯米線,普通到唔知點形容。

註1:餸菜份量偏少,多人食的話應該要加大。

註2:面向維港景的枱,每位收費最少HK$300(風景果然都係要錢買)

http://www.openrice.com/restaurant/sr2.htm?shopid=40671

食海鮮

上星期去咗屯門三聖邨食海鮮。
呢間都ok嘅,比起以前,
依家三聖啲酒家乾淨企理好多。

九節蝦,細細隻,幾鮮甜。

招牌柴燒燒鵝,我覺得一般啦,食不出有咩特別。

上湯龍蝦伊麵,勁大份!可能隻龍蝦好大隻......多肉好味。

上湯大花甲,好香酒味。

蒸石班,咁大條但係蒸出來都好滑,啲肉一啲都唔鞋。

膏蟹蒸蛋白,觸多膏,蛋勁滑,有點花雕香,好正。


http://www.openrice.com/restaurant/sr2.htm?shopid=23627

Wednesday, May 19, 2010

鳥信

某日突然好想食爐端燒,又唔想成日都係去南亭,
誤打誤撞就去咗呢間鳥信。


我以為送的餐前酒。

我以為送的小食。
(原來餐前酒、小食和水果,是每位$50。
無人講,自己係menu睇到,感覺有點奸,
我又無要求要飲酒,你杯酒又細又唔好飲,
小食又唔係特別好食,妖!)

豆腐沙律,個汁好味,無影到,係白色沙律汁,有香濃黑椒味。

燒鳥......試咗燒雞翼、雞胸、京蔥雞、雞脾、雞腎......
普普通通,雞有雞味囉!唔值咁貴囉!
(唔知係咪因為有點被屈錢感覺,所以有啲唔順氣)

鹽燒岩魚,ok啦,啲鹽最好味。鬼死咁細條,收你120蚊。

呢間嘢唔會再去喇!又貴又普通!
我都係去返南亭算喇!起碼價錢合理又好食!

http://www.openrice.com/restaurant/sr2.htm?shopid=42316