Monday, July 26, 2010

Defendor




同Kick Ass同期,以為好似Kick Ass咁好笑,神經佬以為自己係super hero。點知呢套戲其實係悲劇,都幾悲下添,同埋節奏都有少少慢。不過Woody Harrelson係要睇呢套戲嘅原因,佢真係一個非常之有感染力嘅演員,每一套戲都有唔同演繹,好強。

飛砂風中轉


無無聊聊睇咗呢套戲,出乎意料咁好笑,莊文強呢個金牌編劇第一次做導演,雖然係古惑仔做題材,不過拍出來感覺又幾新鮮,幾好笑。而鄭伊健同陳小春呢兩個「古惑佬」配搭,行出嚟已經好江湖,小春做得唔錯架,伊健就十年如一,永遠都係一個表情,搵佢做呢個角色好可能都係因為「陳浩南」深入民心。最好笑反而係劉浩龍同陳子聰呢對兄弟,真係低能到笑死我。

呢套戲名來自發哥我有黑社會的日子主題曲,講出人在江湖身不由己嘅無奈。不過導演講得好嘅係,你有無為自己做少少嘢呢?有無去盡力掙扎呢?有無諗下計呢?定係你由得自己不情不願但係都順住個勢去呢?

Sunday, July 25, 2010

劉感恩

今個星期,情緒只是再低落,越來越低,頭就越來越痛。似乎我開始要強迫自己控制一下情緒,因為我真的不想再頭痛加作嘔,而且也真的被抑鬱折磨得很累。

不過,感恩週記還是要繼續。


1)其實再不開心,大喊出來是舒暢的,即使第二天又累又眼腫。

2)多謝別人對我的無理橫蠻包容,這不容易,我知道的。

3)非常非常喜歡Bodyshop的White Musk shower gel和body lotion,用完皮膚仲好滑添。

4)看了好的電影,特別是港產片,更加要感恩。

Saturday, July 24, 2010

經典





呢個鐵達時廣告,睇幾多次,都會睇到眼濕濕。吳倩蓮臨尾果個依依不捨嘅眼神,加埋果句講咗咁多年嘅VO「不在乎天長地久,只在乎曾經擁有。」,睇到人心都實埋。

換著依家,啲客會問:「點解不在乎?佢明明係應該好在乎架,唔在乎就唔會喊啦。成條片個branding係邊呀?我睇到兩分四十秒先見到logo喎,唔得喎,唔該放個logo喺右上角,個logo要大啲。周潤發咁少close-up嘅?俾咗咁多錢佢,唔該加多幾鏡正面close-up,仲有可唔可以見到佢戴住我哋product呀,記住要close-up喎。個music太soft喇,可唔可以up-beat啲呀?條片啲色又太灰喇,唔該tune得佢bright啲,我想成條片個tone都開心啲,無咁sad。唔,其實都無乜其他comment喇,不過我哋既然拍得兩分幾鐘,我想後面果一分鐘more product-focus,個product shot要耐啲囉,依家太快喇,我驚人哋都唔知我哋賣乜,唔該改一改個cut。同埋個script唔該講埋我哋依家香港九龍新界有幾多間分店,我唔想啲人睇完都唔知去邊度買,仲有個summer offer買滿一千蚊就買一送一,記住講埋喎,重要加埋super就最好喇,我驚啲人聽唔到。唔該晒。」然後你想像一下個製成品出街時係點






另一個值得回味嘅廣告,都係戰時亂世feel,都係超級浪漫,不過就係兩小無猜果種。直到依家我都仲非常記得每一鏡,拍得真係好靚。如此經典,真係值得一睇再睇。

唔係好識

好多嘢,其實我都唔係好識,唔係完全唔識,只係識少少又有好多唔識咁。

就好似:

﹣唔係好識表達自己。經常詞不達意,或多或少係天生性格,亦都有少少職業病影響,每個字,無論講定寫出嚟之前,都好似要諗一大輪,結果因為諗得太多,講得太少,人哋就明得更少。然後我就好快跳到去結論:無人明白我。

﹣待人處事。我好老脾時,可以笑面迎人,禮貌周到,處處包容;唔好老脾時,把嘴臭過屎坑,賤到跌落街,發起火時同原始人無分別,野蠻惡死殺人王都無我咁狠。不過事後往往後悔萬分,原來我本性善良(偷笑),爆完一輪之後,就覺得自己出口傷人,惡毒無比,慚愧不已。

﹣同親密嘅人相處。無論屋企人,定係另一半,某程度上我都覺得大家係相處唔到。只要同我同一屋簷下嘅人,都會覺得我難頂,因為我需要極大極大私人空間,最怕人煩我,特別係我專心做緊自己嘢時,有人打擾(人哋只係問你一句:你食唔食飯呀?)我就立即發忟憎喇;再講多兩句,依依哦哦,我就發癲喇。呢個本性我真係唔知點改,我好想話,有時唔係我難相處,而係好多人都好「有入侵性」,唔識得保持距離(但當距離太大時我又唔鍾意,你話一齊生活,真係煩到爆)我真係唔係好識,兩個人應該點相處。

﹣面對討厭嘅人。我一覺得果條友乞人憎,就好難改變感覺,佢永遠都係咁乞人憎。佢講一句嘢,都覺得嘈;見到佢個樣,就覺得煩。我又扮唔到友善,又唔會直接打擊人,所以我面對乞人憎嘅人,就係避得就避,盡量避免接觸,就唔駛煩。無奈現實果啲乞人憎嘅人,每一日都係你身邊,好似七仔咁緊有一個係附近,仲要成日主動煩住你,真係好痛苦。我嘅黑面同冷淡其實都好明顯,點解啲人都仲係唔識趣?點樣先可以趕絕討厭嘅人?





最近情緒真係好低落,厭世程度極高,因為發生太多不愉快事件,直頭有啲抑鬱。我知自己某啲位係「唔達標」,唔稱職,唔係一個「妥當」嘅人。不過當我成日遷就其他人、顧及其他人、做好人後,咁邊個嚟就我?邊個顧及我感受?邊個尊重我?邊個體諒我?

我知我唔可以無止境咁要求人哋去遷就我或體諒我,不過我都有攰嘅時候。我唔係想無止境,我只係想大家公平啲者。我想對自己好啲,我想自己自私惡毒時無罪惡感、無內疚感,我想做只係自己想做嘅,我想不負責任,我想抖抖氣,我逃離去另一個地方。因為我唔係好識,點樣同世界所有人相處,包括我自己。

Friday, July 23, 2010

兩套港產片


第一次覺得,劉若英係幾好。
(我知佢有好多粉絲,但我從來不過電)
亦都係第一次覺得,古天樂做戲原來都ok嘅。


第一次覺得彭浩翔無咁扮嘢;
不過楊千嬅做戲都仲係幾難頂。
套戲劇本算ok寫實,特別係啲粗口,
(除咗廣告人食飯飲幾萬蚊支紅酒依家無呢支歌仔唱喇)
最感觸都係,男女關係俾人果種患得患失感覺、失望同猜疑。
呢啲細位,捕捉得幾準。

Questions



睇得第一本,唔爭在睇埋第二本。繼續妙問妙答,字字珠璣,一貫Saatchi的串嘴聰明又搞笑。

Thursday, July 22, 2010

憎

我平時嘻皮笑臉,吹水唔抹嘴,不過講到重要事,例如工作上,或係有人要我幫手之事,唔係風花雪月飲飲食食之事,我應承得人嘅嘢,就一定做得到。

講得出,做得到,有幾難?我又唔係話保證你成功移民,或者自製核彈,其實平日可以做嘅嘢,有幾難?

如果真係好撚難,或唔撚想做,咪直接講囉。最差就係自己無能力去做,但就口口聲聲話會同你去做,應承得人,自己又唔去承擔,轉下頭就玩失蹤,扮失憶,無咗回事,而你應承咗人,就俾咗個希望人哋,於是就on99咁等你,以為你真係會去做。

唔該,對自己語言負責任,呢個係正人君子行為,基本人格必備。唔好撚順口開河,講撚完就算,人哋當你啲說話係認真,你自己原來咁撚唔認真,即係當人係傻仔啦。講就天花龍鳳,乜乜七七,做就時就自動消失。口講同行動完全相反,係咪有「身口完全失調檬撚症」?

我覺得我呢世都成撚日做傻仔,太多人演技太撚好,吹水時敷衍你時勁撚認真咁,屌你我點撚樣睇得出呀?我交個心出嚟,你講乜撚我都信九成啦基本上。而你原來唔撚當係一回事,咁我點撚樣呀?我咪好撚七咁等你個仆街?然後,當我忍唔撚到發老脾時,就死撚晒狗咁沙撚晒冧,屌你行撚開啦!咪撚以為所有嘢就係講句sorry就無撚事,你自己唔撚尊重人先,加下我洗撚尊重返你咩?真係on撚七9低9能痴撚線!

可能係我太天真,我只係諗到高登巴打金句「認真你就輸了」;無撚錯,人哋唔當你係一回事,你自己就咁撚認真把撚咩!呢次真係輸啦,輸撚咗都好,又有一次教訓。

不過我知自己性格改唔撚到,以後相信都係會繼續keep住信人然後keep住又信撚錯人之後又keep住屌人。無撚計,我寧願我係認真,我係輸果個,好過啲撚樣周九圍做埋啲不負責任嘢,我對自己人格仲有少少信心。我係on9,吹咩?on9都好過你仆街,憎。






以上文字,適用於所有人際關係。

Sunday, July 18, 2010

劉感恩

星期日的晚上,很不開心,還要寫感恩週記,越來越覺得其難度之高。很多事情我都不太懂,也不由我去操控,我好像只能「隨遇而安」,無奈面對那麼多的未知,心裡怎樣也很難「安」下來;如果可以由我去決定的呢?我喜歡怎樣就怎樣,真的很爽,但又會否換來「自私」的名義呢?我怎樣做都好像不對,怎樣做都不夠好,你們還想我怎樣?有時候,很想獨個兒買張機票就飛走,沒有計劃,沒有同伴,沒有負擔,你們所有人都不要煩我,我無需再演任何角色,也不屬於任何人。

這只是幻想,我每天都需要躲進幻想中,逃避討厭的現實,軟弱得無可救藥,卻起碼有短暫的快樂;現實是討厭、殘酷、無可操控,有那麼多討厭的人和事,嘗試去污染你、扭曲你;所有事都是無聊、無意義,所有人都活在自己幻覺中,也不用寄望有人能拯救你;而事實上,你的確累了,就只能在幻想中,仍保著一點殘念、一點希望、一點自我安慰。


今次的感恩週記,能寫下的就只是,我慶幸即使我厭世致極,但今日仍然健在,僅此而已。

Saturday, July 17, 2010

Toy Story 3


Pixar總有能力令人眼濕濕:Toy Story 2,Up,Wall.E,Finding Nemo...都有看得人鼻頭一酸的片段。今次Toy Story 3大約有八成時間笑到肚痛,其餘兩成,就是看得人熱淚盈眶。

看著Andy長大離家,這套橫跨兩個世紀的電影,可能太有感情、太真實的關係,看到最後真的深深地感動,忍著眼淚說再見。

Wednesday, July 14, 2010

治療


因為家中的書架就快爆棚,不想再怒買書,所以與同事來個「交換閱讀計劃」,大家一本換一本,推介自己覺得好看的書。

本來對懸疑小說沒大興趣,不過既然交換了,就看看吧。這本《治療》一看就停不下來,因為情節實在很「吊癮」,令人永遠都好奇下一個章節是怎樣,過程好像在看一套驚慄片一樣,不停的追看下去;不是驚世的文學巨著,看罷沒有深刻感受,不過流行讀物就是很有娛樂性,用來分散注意力一流。

Monday, July 12, 2010

Predators



呢啲戲,無咩劇情好講,拍得緊張、視覺上刺激,就夠晒喇,呢套戲都ok,由頭到尾都唔悶;我睇當然係因為Adrien Brody做男主角,40吋胸肌呀,想點,型到爆燈。

劉感恩

今個星期的工作量、工作上的沮喪、公司上的人事很令人作嘔,心情很差,要寫感恩的事,腦中只得隱約幾件事:


1)又去打邊爐,今次去了謙記,雖然水準沒有從前的好,但與朋友們吃飯還是開心的。西門兄,努力呀,總有更好的在將來。

2)我最喜愛的國家隊西班牙歷史性地贏了世界盃!保羅很強!可惜,該死的無線沒有轉播捧盃,真的很想殺人。

3)星期一sick leave算不算要感恩的事?可以在家裡休息一下,嚴重的偏頭痛令人受不了,看球賽時不是吃薯片,而是吃止痛藥,該死!算吧,至少要感恩一下我有止痛藥可以吃。

4)美容師的手勢,真是非常非常的好。

5)週末出外走走,去了南生圍,曬到pk,不過環境很美,還吃到很美味的有機蕃薯葉。






Thursday, July 8, 2010

石田徹也


最近炎炎夏日,陽光普照,心情卻相反地像石田徹也的畫一樣。也難怪他自殺,如果他的世界只剩下這些。


http://www.toxel.com/inspiration/2008/11/07/incredible-paintings-by-tetsuya-ishida/

Wednesday, July 7, 2010

我還可以做什麼

好老土的一句說話:「性格改變命運。」


某程度上我的確符合我的「破軍」命格,鍾意忠心護主,有個任務、有清晰方向、我就會努力向前衝,沒有太多顧慮,衝呀衝的一股魯勁,愛冒險,撞板多過食飯,不管死活,但只要有讓我去努力的原因,就感到很愉快。

這是非常敵合應用在工作上,對於我喜歡的上司、我心裡佩服和欣賞的上司,我的確是會不遺餘力,盡心去做到他們滿意為止,彷彿我天生就是一頭工作犬,有個任務給我,我就非常高興。

雖然我有「破軍」的衝勁,卻也有「天蠍」的低調。

我的確喜歡低頭做呀做,專心一意拼命的搏呀搏。而「天蠍」賜予我沉默、內向、老實、不愛浮誇炫耀的性質,令我不會對住高高在上的老細們做些擦鞋、表現自己的行為,我真的做不出。我的觀點是,如果你真的是有腦、有眼光的老細,你會知道我付出了甚麼。或許我的觀點太天真,因為這是員工的出發點,不是老細的。做老細的,可能都想身邊有些人在討好自己,盲目順從,不過再重覆一次,我真的做不到。

我不介意他們從不留意到我的存在,但會介意因為我的沉默,而令他們覺得我不是在「工作」,沒有價值。

工作都是為了肯定,有了肯定,才有錢;我不是聖人,不是在做義工,我的工作又不是做DJ,又不是做賣唱的,為什麼要我去「表演」?我付出那麼多,回報那麼少,身心都有點累。

改變命運,是否真的要從明天開始,我準時到老細房裡表演跳火圈?或是經常讚美他一番?

有沒有人告訴我,想成功的話,除了要「運」之外,還需要什麼?其實我還可以做什麼?

my name is Charles Saatchi and I am an artoholic




Saatchi呢個名,做廣告嘅人一定識,因為係一間好出名嘅廣告公司名;去過倫敦嘅人,又一定會聽過Saatchi呢間咁出名嘅contemporary art museum,無錯,創辦人都係同一條友:Charles Saatchi。

咪睇佢其貌不揚,佢打拼廣告天下時曾經同Ridley Scott、Alan Parker做過嘢;藝術界又捧紅了一個Damien Hirst同一個Tracey Emin,獨具慧眼,藝術家作品俾佢買下,升值N倍。私生活方面,前妻就係美女廚神Nigella Lawson,有錢有品味有事業有靚女老婆,真係「點到你唔服?」

因為佢極少接受訪問,所以呢本書,集合咗好多記者同大眾問佢嘅問題,從藝術到無聊電視劇嘅問題都有,真係值得一看。文字間睇得出佢有幾招積、有幾串嘴、有幾幽默,非常過癮。佢串得起,睇完唔會問「點解我要服?」因為佢的確係好勁。

Tuesday, July 6, 2010

mystical machine gun






去不到Kula Shaker的live,也不太要緊,一切隨緣。最近又再聽他們的唱片,停不了的聽完又聽。這首mystical machine gun不是最好的一首,不過卻在腦裡重播又重播。

可能歌詞對外星人講話,所以特別有共鳴,因為我一直覺得自己來自很遙遠的星球,穿梭了那麼多的光年與距離,一個活了很久、很老的靈魂,此刻就被困在這個地球人的驅體裡。

歌詞最後的一句:now you gotta be strong...總是在腦裡徘徊。

也好像是對我說,因為之前的旅程很漫長,很累人,來到這異地,也只能gotta be strong。

Sunday, July 4, 2010

邱吉爾,樂在危險的人生


有關邱吉爾的傳記成千上萬,不知從何入手,就選擇Paul Johnson這本比較「薄」的,而且因為懶,所以看中文。不過這也是台灣翻譯,閱讀的全程令我覺得不舒服,因為台式的翻譯看上去古怪累贅,有時甚至覺得詞不達意。

幸好Paul Johnson撰寫的傳記,是記下邱吉爾生平中的大事,省去很多繁複的細節,也加插很多迭事,讀起來有點趣味。

邱吉爾現在受世人所景仰,後人歌頌,原來在世時從政生涯,大部份的時間都是受人(敵人和民眾)鄙視、討厭、憎恨;他的一生中雖然創下了很多功績,卻也同時充滿了錯敗和沮喪,可是他對自己的理念還是一直堅持,從不放棄。看完有點安慰,即使偉人如他,人生也有很多失落的日子,只要有機會再出現,再盡力去把握,也為時未晚。

可能他是born in the right time的英雄,一生中有兩次世界大戰作為舞台,還有其他無數戰役讓他領功,實在有點「時勢做英雄」的感覺。要是他生於現代,像他自己所說一樣投胎成為了中國人,還要是生長在香港這地方的話,在現今看不到的戰爭中,那他會選擇妥協,還是選擇掟蕉?無論怎樣,他的口才那麼好,創造了那麼多獨特詞彙和金句,斷估也不會說出「癌上腦」這些無義意的毒話。

劉感恩

本星期心情有點低落,感恩週記要記下的事項不太多:


1)有新相機玩,玩得很開心,還有賣出兩部舊相機,thank you very much

2)滴滴幫我買的新衫到手,很美;也嘴賤了一晚,爽

3)自己又買了衫和鞋,不停出血,靠物慾麻醉自己

4)外出睇波,本來無位要企,後來搵到好位坐足一晚

5)Sandy非常有效率地買了票看雲門舞集《流浪者之歌》,我們很久沒有一起去看跳舞了,很期待!從前我們經常一起踏入文化中心或葵青劇院!(後來陳強他們買kula shaker live票時,才知撞了日期,唯有放棄kula shaker)



大概就是這樣了。

Parasomnia




我以為好恐怖,點知都係膠膠地,盡其量都係一個崎型浪漫愛情故事,一啲都唔驚。

Shrek Forever After


好睇,好笑,好感人,好貴(3D)。