Showing posts with label 懶人煮食. Show all posts
Showing posts with label 懶人煮食. Show all posts

Monday, July 2, 2012

劉感恩

又一星期,要感恩的又是離不開食,我也太有口福了。我這種很少食住家飯的人,實在太久太久沒有喝過湯,感到極之枯燥,想要點滋潤。於是星期五和星期六都在家裡煮飯煲湯(今次不是我煮,可以飯來張口!真開心!),有我最喜愛的青紅蘿蔔粟米湯,還有又甜又潤的蕃茄薯仔魚湯。非常簡單的兩餸一湯,足以令我感到非常滿足。


星期日就去了別人家裡BBQ,非常好吃,但大熱天BBQ實在令人溶化,如果秋冬會更爽。晚上睇歐洲國家盃總決賽又再食宵夜,結果非常熱氣,再煲個皮蛋莞西湯下火,之後兩天喉嚨都不舒服。



Hugo豬,一齊迎接夏天!

Wednesday, June 27, 2012

六月之「食」

六月其實好多飯局同節目,親友生日,父親節,舊同事婚禮......所以食咗唔少好嘢,感恩有咁多機會同咁多人一齊飲飲食食。



呢個生日蛋糕,真係同生日果位朋友襯到絕!見到真係大笑!

淺水灣婚禮真係浪漫,新娘好靚好高貴,地方又有格調,羨慕!食物同酒都不錯,龍蝦湯好好味,但因為頭盤一舊鵝肝就飽到上心口。

舅父生日飯+父親節飯,又去咗小南國,哈哈,今次叫套餐麻麻地,但個撈麵仍然咁好食,再加個blueberry cheese cake做生日蛋糕,好滿足!

另一餐住家父親節飯,叫外送海鮮,又抵食又好味,我真係好愛麵包蟹!啲蟹膏多到食完第二日即刻走去gym做運動!

出去食得多,終於有個週末唔想出街,加上天氣又係天陰有雨,更加只係想喺屋企食食食同瞓瞓瞓,真係可以攬住Hugo瞓足大半日!同佢一齊午睡嘅時光真係好幸福......然後夜晚落街散步又係好幸福......Hugo成功做咗絕育手術,又話會乖啲,唔知點解越來越百厭!但無損我對法國老虎狗嘅鍾愛......更加想要多一隻米色嘅......"Frenchie is like chips, you just don't have one."好貼切嘅形容。
喺屋企無咩嘢做,就煮下飯。因為平時帶便當成日食飯,食到有啲厭,所以weekend煮西餐!食牛嘅就食牛扒,唔食牛我就食烤三文魚,百佳好平果啲三文魚塊原來調好個汁去烤其實都好好食,同埋好耐無整嘅薯蓉都成功,好飽。


呢個係芥末忌廉汁三文魚加牛油磨菇,其實仲有意粉伴食。
下次我想試下整法式芥末蛋。

同食無關,無啦啦收到禮物,開心,做咗咁耐嘢終於有支似樣嘅筆用。

Sunday, December 18, 2011

劉感恩

1)上星期工作上都係一樣咁痛苦,更多濕濕碎碎煩嘢,加上要同個客周旋,煩到人都癲,直屬上司放假,所有嘢就交俾我同另一個同事做,無人照住,又係一個試練比自己,真係要努力去做好每一件事。但加上M痛,全身都有痛,全身都有形容唔到嘅不適,力都無,仲要起身返工簡直係慘烈......我強烈要求香港立法每個月有M假一日,比女性最辛苦嘅一日有得休息下......

2)星期六得返半條人命,留家休息,住家男人上次煎倉魚失敗(皮爛),今次再試終於成功;同埋再試煲菜乾湯,冬天飲碗熱湯真係好warm。


3)星期五公司有function,晨早上到山頂廣場,在某餐廳食早餐;全公司人多到嘔,根本無可能認得所有人。高高興興一個朝早,之後落山去同事嘅個人展覽,再行下街然後返屋企,已經攰到嘔電......

4)星期日朝早出去飲茶,然後去睇MI4(出乎意料好睇);夜晚去咗荃新天地新開張嘅大戶屋,水準同康山果間類近,都係咁好食。(可惜我全日頭痛,未能盡情享受,要用止痛藥送飯)

5)好少支持個客支持得咁盡,但今次Hello Kitty x Tokidoki又的確好得意,製成品嘅品質都唔錯,所以都換咗3隻,上網玩遊戲仲有得換毛公仔版本,我日日都好努力玩㗎喇!不過未成功!

6)天氣凍,唔想老甘凍親,用我件舊毛衣剪開佢,做咗個cover蓋住阿甘瞓覺嘅「山洞」,做咗間「小紅屋」比佢;佢當然好冧,成個頭攝入去個手袖位到,包住個頭暖笠笠咁瞓,真係叫佢都唔願醒!

Monday, December 12, 2011

劉感恩

1)上星期突然好忙......所有job都湧出來,全部都又急又濕瑣又煩,見到都想嘔,有啲令人發癲。但都係要做,只能夠默默忍受,期待聖誕快啲到,我想放假呀!基本上今年無咩放過假,無真正休息過,無真正旅行過,有啲灰,放假喺屋企hea下都好過無。

2)廚房多咗好多新廚具,好得人驚,整咗個煎倉魚,買咗個新煲,又繼續煲湯,煤氣費應該會高過之前。


3)另一個煤氣費上升原因,就係開始煮便當帶返工食,上星期煮咗三日,要早啲起身煮飯其實真係好攰,特別天氣凍!但可以慳到錢又幾開心(慳得少少就想去買嘢,真係敗家)。同埋有人送咗個新飯盒比我,靚好多!
4)星期五同星期六連續打兩晚邊爐,結果生咗兩粒暗瘡(哭)。但天寒地凍我真係控制唔到果種口慾囉。同朋友兩條友任食火鍋,食咗成晚,食完一直吹水,汽水任飲,每人都係百幾蚊,真係幾抵。星期六返屋企打,始終都係媽媽好,打邊爐之餘又有下火湯飲。

5)週末雖然好凍但好陽光,無咩藉口唔出去運動下跑下步。跑去汀九,回程時更發掘下汀九一帶海邊沙灘,發現一個好靚又無乜人嘅公園,淨係有人釣魚,同埋發現一個有得打沙灘排球嘅沙灘,感覺真係好放假feel,陽光,海灘,打排球,嘻笑,釣魚,寧靜......住喺果頭嘅海邊真係好正,仲路經見到蘇民鋒間屋。一路跑時,因為多斜路,所以真係好辛苦,臨跑完時差啲抽筋(好耐無跑過,天氣凍只係想呢埋喺被窩裡面......),跑返屋企時頂唔順,要食個下午茶補充下。

Sunday, December 4, 2011

劉感恩

1)上星期中返工帶咗兩日飯,成功慳咗兩日錢;為咗達到「唔用微波爐翻叮」原則,所以本小姐晚上放工買點餸,清洗切好,然後第二日一朝早煮,午飯時就直接食。我無保溫飯盒,慢慢接受室溫食,與同事朋友研究點樣整一個好食嘅便當,其實除咗慳錢,仲食得健康啲,又有滿足感,希望一星期都煮到兩、三日啦。

2)朋友生日去食飯,Classified嘅大坑分店比人感覺溫暖自在,一圍人食下嘢吹下水幾開心。

餐前小食:班尼迪蛋,水牛芝士蕃茄多士,羊奶芝士沙律,
全部都超好食,個蛋仲要叫多一次先夠喉。
芝士的世界:焗芝士配麵包,中型芝士盤
焗芝士香滑漏出來,擦上鬆軟麵包上,真係好食到喊;
芝士盤都係牛奶芝士(因為羊奶太臭喇,有人食唔到),由強到淡味共5款,配紅酒真係好正,但9個人食唔晒,最後壽星仔打包剩底果啲。
Pasta的天地:四款都好食,醬汁好出色,risotto夠正宗,
新鮮home-made egg pasta夠晒蛋味。
pizza我覺得正常好食,無咩特別,夠薄夠脆。
好豪華嘅生日蛋糕,成為一道好好嘅飯後甜品。

3)因為上次寫一寫我家男人嘅住家菜,今個週末佢繼續試煮新嘢(睇下幾時厭),同埋唔知係咪激發起佢嘅「煮婦」DNA,竟然買咗大量廚房新器具,水煲、油樽、刨皮器、刀、調味樽、收納盒......好驚,有人會變全職煮婦。

星期六整咗蕃茄洋蔥魚柳,開開胃胃;同埋繼啫啫雞煲後,整咗個啫啫芥蘭煲,但係好咸囉!
老火湯就有菜乾紅蘿蔔湯,好滋潤嘅感覺。

4)星期日出去「襯」,尖沙咀海港城年年都聖誕都佈置得好靚,但實在人多到呢,好似全香港人都迫晒喺同一個地方,再加埋大陸人,去到真係舉步難行!每行半步就想爆粗!真係迫到嬲!
但呢個三眼仔聖誕樹又幾好笑嘅。

同埋出去行街嘅重點,其實都係想買嘢者。
自己送俾自己聖誕禮物(聖誕節真係一個買嘢嘅好藉口)又靚又實用,終於買到好開心。
但當然,係人送的話會更開心囉(酸溜溜),
有啲嘢真係女人先明白,同埋有啲嘢女人真係唔會明白。

Tuesday, November 29, 2011

雄性住家菜

我家中的那個男人,剛拍拖時,聲稱自己雖未致於五星級大鼠,但煮飯都算好食;好快有機會下廚,第一次整了一個咸魚煲仔飯和炒白菜(好遺憾沒有拍下照片來),都算ok好食,起碼飯是熱的熟的有焦的,菜是油的有味的,而且本小姐極喜歡咸魚,有咸魚伴飯什麼也能吃得下。其後搬家同一屋簷下,下廚機會多了,有時我煮,有時他煮,他煮的情況是:1,我太累不想煮,也不想叫外賣;2,他嫌我煮得難吃,看不過眼就自己來。(沒辦法,我慣了少油少鹽清清淡淡,也沒有當全職煮婦的經驗,那我怎麼能煮的像他的媽媽一樣好呢?)

最初他經常煮煲仔飯,將他的招牌菜發揚光大,頻密到一個地步是,煮到連瓦煲都爆爛了。然後厭了,再試弄別的,原則都是要base on「易整」,例如:

豆豉鯪魚油默菜,雞翼(煎、烤、鹵水都有)
這兩款菜,起碼做過一百次。(其實還有蒸水蛋,應該超過兩百次)

雞翼的狂熱冷卻點之後,再來其他「招牌菜」(左起):
超濃蕃茄蛋(見到不蛋!)黃金炒飯(有時用新鮮飯)西蘭花雞柳
這幾味,吃過也不下百次。


有時煮炒意粉,都幾好食;中間還是雞柳,不過換了三色椒;
最右是清蒸龍躉肉,之前與家人打邊爐試過真的很鮮很好食,所以自己買來試蒸,但發現原來很貴所以蒸了一次就放棄了。這算是一個昂貴的新嘗試。


最近,他在荃灣的「民豐」買餃子結我食,雖然是素餃,但我一吃愛上;結果,我們最近都變成北方人,幾乎每星期食一次民豐的餃子(要我天天食也不介意)另外民豐的韭菜煎餅也是好吃得過份。


但是他心血來潮,可能做北方人做耐了餃子吃多了,於是他開始pick up廣東的傳統:煲湯。
也有另一個原因,就是他嫌我煲的湯不夠料,不夠好味(老娘又不是廚娘!)
所以有一個週末,他去街市買菜,回來時大包小包,買了十個人的份量來煲!
以下就是那個青紅蘿蔔豬骨湯,而且他只顧煲,沒有加水,結果只煲得兩大碗,湯濃不見碗底。

到他學會煲湯時間中加點水之後,就再學做其他新菜色,以下是他最新秋冬傑作:
啫啫雞煲。這個菜,我回家時在家外的走廊都能聞得到香味,一進門香到口水直流。

基於我這個愛食菜的人要求,通常每餐都有菜。以下是吃得最多的豆苗、西蘭花和菜心。

當我想記下他煮過什麼時,才發現當初由每餐食雞翼,到今天連湯都學會煲了,真感動啊。經我的悉心栽培下,令他先厭棄我煮的飯,然後令他踏上煮飯之路,成為一個住家菜,我的育成計劃算是成功了一半。未來我還想吃八寶鴨、蒸魚腸、炆花鱔、blueberry cheese cake...etc.

Sunday, September 25, 2011

哎喲

持續開夜,今個星期將會繼續呢個無間地獄,因為太攰,好多嘢都無寫低,心裡9成都係煩公事。然後剩下果1成,就煩私事。上星期週末出咗去玩,食咗餐好味嘅意大利嘢,又有得去玩飲下啤酒吹下水,幾開心,而且又多一個朋友有喜事,都覺得開心嘅。今個週末就因為太太太太攰,留喺屋企煮下飯就算,實在太耐無煮過正常嘅一餐(有飯有餸有湯)清茶淡飯最啱唔夠瞓肝火盛嘅我。自己第一次煮咗個「白酒煮蜆」,酒味太濃但都OK,好彩洗得乾淨無咩沙。另外一個「香煎三文魚腩」就失敗喇,我始終覺得熟嘅三文魚好腥,要加大量檸檬汁,但結果又太檸檬味,早知唔整。


另外,唔,其實我發嘅脾氣真係極之無聊,點講都係我太苛刻高要求臭脾氣,其實一啲都唔關其他人事。
我想講,其實問或唔問,用何形式問,我都一早都決定會一直留在你身邊了。我係一個超麻煩嘅人,而身邊有一個一直遷就、體諒同支持我嘅人,我心存無限感恩。



Tuesday, March 22, 2011

我愛味噌

日本地震後,除了擔心日本災民情況,還有擔心日後復國進展。我相信9成香港人都熱愛日本這個可愛的國家,我自己和很多親友都是每年要去最少一次日本。如今會有很長的時間不適合去(除非救援振災),身處香港又有人擔心日本進口食物有輻射。

但應無損我對日本食物的熱愛,我大概還會食壽司、食刺身,反正這個年代,食什麼也是有毒致命,要麼像盧冠庭般生活,要麼就吃了才算。

早陣子買了的支裝味蹭,用過來打邊爐,跟海鮮超配,非常好食。最近心血來潮,想起自己在餐廳食過味噌意大利粉,出奇的配合和好味,於是自己在家試做。只需煮熟一般意粉,加少許味噌和水,加點黑胡椒,混在一起食,好好味!!!!!



螺絲粉能藏更多汁在紋理中,食落去更正!


然後我瘋了,煮出前一丁棄用原裝味精,改用味噌湯底,照舊加原裝麻油,都還可以。(但我個人認為配pasta是最好食)




或者遲些我會向「味噌撈飯」或「味噌炒菜」進發......應該可行的吧?

Sunday, October 10, 2010

劉感恩

1)回到公司,卻未回魂,幸好工作量不太多,不太需要用腦。

2)因為去旅行時提早了生理時鐘,回到香港繼續早睡早起。(六時就醒來了,十時多就眼睏,有點老人家的感覺)

3)買了隻急凍蟹回來,自己做了個蟹餐,努力重拾點北海道風味,無奈,食過新鮮的蟹,急凍真的差很遠。

蟹腳多多肉,咸了點。

用三文魚和蟹蓋做了個豆腐海鮮鍋,不過沒有用味噌,用了豬骨湯底。

4)回到香港才發現自己買錯了杯麵,幸好阿姨還在北海道,立即叫她幫我再補購,這個7-eleven出的咖哩杯麵,比cup noodle那個好吃得多了!

5)去旅行時安置了甘甘在娘家,好掛住牠啊!終於回來了,見到牠真安心。

Sunday, September 26, 2010

劉感恩

1)過了中秋節,又一個中秋。

2)報告出了,感謝檢查結果沒事,鬆一口氣。

3)用盡所有勇氣去見牙醫,一年洗一次牙,非常的害怕,感謝捱過了那漫長的二十分鐘。

4)自己動手將木酒盒「改妝」,很喜歡廢物再造的感覺,很多「廢物」不一定是廢物,我們不要製造太多浪費,感謝完成品給我的滿足感。

5)很久沒有煮飯了,再用史雲生250方便裝雞湯,煮咗呢個粉絲節瓜鮮魷。
還滾了一個波菜瘦肉豆腐湯,感謝這一餐簡單又好味。

6)無心插柳下,終於去了香港迪士尼,玩了一整天很開心,感謝可以這麼隨意又可以玩得這麼快樂。(回到家後來卻因為成個腦都係米老鼠,所以失眠到天光,真係開心過頭,超攰。)