Sunday, March 14, 2010

Crazy Heart





今屆Oscar嘅結果,真係有啲可圈可點,見人見智。Hurt Locker有幾好睇,之前我都講過,失實又有啲悶,應該未去到攞獎;Avatar同James Cameron落敗最佳電影同導演,某程度上,都係因為Oscar背後嘅政治意味:點會俾你呢個粗漢攞兩次獎?難度又俾你喺台上面大叫"I'm the king of the world!"?同埋你套Avatar嘲諷打仗熱血戰士,點同歌頌美軍嘅Hurt Locker比?Sandra Bullock攞最佳女主角,都係因為Meryl Streep果套Julie and Julia拍得麻麻,令佢未有得完全發揮,而另一對手An Education的Carey Mulligan做得好好,不過太年輕加上係英國人,未似做得最佳女主角;如果唔係,Sandra Bullock雖然做得好,不過都係尚未達到攞獎水平。最令我覺得合理嘅,應該只係最佳男配角,Inglorious Basterds的Christoph Waltz,此君嘅精彩演出真係妙算,冷酷眼神加歪嘴笑客,真係冷血奸角嘅新典範,期待佢日後做下其他角色,再研究下佢嘅魅力。

至於呢套Crazy Heart,男主角Jeff Bridges攞咗最佳男主角,同樣有個問題,就係:唔係唔好,不過又未到攞獎。故事講過氣鄉謠歌手,又窮又酗酒,人生潦倒,一塌糊塗,遇上單親媽媽fall in love,以為可以重新來過,但因為酗酒問題最後卻「相愛不能在一起」。有啲熟,係喎,同上上年The Wrestler咪一樣囉?超,玩野咩,又係同一條橋,唔通中年男人翻生呢條橋真係咁感人?

Nina Assassin




你都咪話,原本對阿Rain真係完全無感覺,睇完之後,真係覺得佢好有型,同埋好cute。成身肌肉,加個迷人單眼皮,同埋打到飛起嘅場面,亞洲男明星打進荷里活真係好難,阿Rain表現算係幾好架喇,難得表現到亞洲男人都可以好man同好hot。

Monday, March 8, 2010

8 1/2








既然Nine是向費里尼的8 1/2致敬,看完之後,當然立即看原裝的「八部半」。立即愛上費里尼的黑白影像,現實與夢幻的光影。Nine拍得有點沉重和認真,反而8 1/2有很重的喜劇感,而且更荒唐怪誕,男主角Guido的幻想、童年回憶、與妻子的關係、江郎才盡的恐懼......沒有Nine拍得那麼明白,卻帶點奇幻幽默的感覺。

Sunday, March 7, 2010

tea

睇完愛麗詩,即刻學返Mad Hatter,嘆下茶啦。
見到啲茶具,好想學野兔掟爛佢!

上層個三文魚酥皮盒好好味呀。
下層個雞翼、果占多士同炸蝦捲都OK,
係個荔枝味cheese cake怪怪咁,可能我唔太鍾意荔枝。

Saturday, March 6, 2010

Alice in Wonderland



呢套戲真係萬眾期待,由當時剛有trailer睇到今日,大家都滿心歡喜等佢上畫。之後一上畫,身邊嘅同事即刻仆到去睇(無計,呢行嘅人特別鍾意靚嘢,有靚嘢睇好緊要),搞到我遲咗幾日去睇都覺得自己有啲out,唔夠update。

今日睇完,只覺得一個字:靚。除此之外,真係無咩特別感覺。Johnny Depp都係咁啦,反而紅心皇后Helena Carter嘅演出既可怕又可愛,其他角色都係ok得意咁囉。其實故事真係無咩特別,只係視覺上有一流享受,包括所有CG場景同戲服。



同場加映:甘甘客串Rabbit一角 :D

Friday, March 5, 2010

懶人煮食:跟住阿蘇...

電視又播《蘇Good》,睇睇下又跟下阿蘇煮啦。

有集佢教炒通菜,原來下鑊之前,
要做好調味,跟住係咁二炒兩下就上得碟。
調味用蠔油同普寧豆醬,加落菜度撈下,再加蒜炒就得。
呢個味道又幾好喎。

另一個係唐醋青瓜荷包蛋,
砌青瓜薄片,加鹽醃約半小時,
再用手搾出水,落糖同白醋撈均;
煎荷包蛋,煎好後砌碎;
倒白醋、糖、老抽落鑊,猛火收乾水,
熄火,下蛋,撈均,再落青瓜撈均。
mytv重溫:
http://mytv.tvb.com/foodandtravel/sogood2/100744#page-1

都幾好味嘅,好多功夫,一啲都唔算懶,
不過斷估應該無阿蘇煮果啲咁好。
佢教炒魚肚、蒸雞果啲真係無可能煮到......

Thursday, March 4, 2010

變...

人是會變,變成怎樣,無人會知。
如果你開始討厭你的朋友,是因為他們變了,還是你變了?
看得太多醜惡臉孔,會不會自己也變成那樣?
或是,你已學會保護自己,築起那厚厚的牆,不讓任何人進入?
你能確定自己不會變成像你討厭的人嗎?
人的確是會變……

蔡瀾說過,人活到某個年紀,就不想浪費在不想見的人身上,應酬也費事,時間寶貴,寧願與令你惕快的人見面。減少朋友,只選擇留下少數「精選」,也是順其自然的事。

林燕妮則覺得,人生處於不同階段,就有不同的朋友同伴;也就是因為人會變,昔日的好友,也會因歲月過去,大家都變了,行了不同的路,漸漸疏離,緣起緣滅,就是如此淡然而已。

我一早知道這些道理。最近,不停的想,有時候,在別人的眼中,我又變成怎樣。早有些朋友已經變得不太能溝通得到;或有些令人煩厭,每次見面都要說些話令你難堪,索性不見;或早已覺得根本就是兩個世界,彼此從來也不太深入了解,算了。

然後,再看看身邊,幸好還有一些總會明白自己、關心自己的朋友。要「留下來」,真的需要緣份。