Saturday, November 20, 2010

Due Date







捱到星期五,終於到週末時,全身骨頭已在痛,非常多的疲累積聚在每吋肌肉和關節,骨火燒到皮膚都覺得痛,雙眼澀到像被火燒,頭痛連續了三十六小時沒停過。我也分不清,自己是太累或是作感冒,無論怎樣,兩者都需要大量睡眠補級一下。不過不想整天都在睡,睡到黃昏醒了,就出去看套電影緩衝一下。

因為Robert Downy Jr.和導演的關係才想看這套喜劇,導演上一套Hangover真是好笑到爆,今次Due Date有點失手,所有笑位都落在肥佬Zach上,Robert Downy也好像只是附和著演一樣。不是不好笑,也有好笑的地方,不過故事有點單調和牽強。

看完回家,還是要吃點止痛藥才能安睡。最近睡得很差,失眠,還不停的造怪夢,我決定將夢用兩三句記錄在徵博裡,有空請去關注一下小妹。

Wednesday, November 17, 2010

Jamiroquai Rock Dust Light Star




第一次聽成隻碟,感覺無咩特別無咩驚;再聽多幾次,開始越來越順耳;然後日日返工放工都聽,覺得聽得好舒服,接受咗。唔知係咪Jay Kay人到中年,歌詞好多感慨,歌曲都無以前咁funk,同埋把聲無以前咁smooth,不過佢仍然係非常之型,只係變咗成熟中年男人果種型。所謂爛船都有三斤釘,無咩期望之下,呢張大碟算係咁喇。

Sunday, November 14, 2010

劉感恩




1)生日lunch with Simon n Mama,我們又再食素,又再與相同的陌生人同枱,真有緣。

2)生日lunch with好同事們,好好食的西餐!

3)星期六的朋友邊爐,又食又玩。

4)星期日的家庭邊爐,非常之飽,還學懂了打越南麻雀。

5)九十分鐘的按摩,手勢非常好,完全地按走了疲勞,按鬆了累爆的雙腿和肩膀。

Friday, November 12, 2010

忍,等

終於星期五,剛去完旅行回來工作當然不爽,若對著討厭的臉孔就更加難過,度日如年,非常煩厭。

從前在某公司都試過成team人一齊辭職,剩下我一個孤兒仔,感覺孤軍作戰,非常寂寞,雖然只是工作上的同事,但長時間相對後就是朋友了;見慣了的面孔走光了,來了新的人,又要重新去適應,這個也不是問題,我都早有經驗了。

問題就是,新來的人當中,有些變得越來越討厭。群龍無首時,就在扮大佬,卻沒有做大佬的料,外型和思想都老土又核突,見到你個樣就想嘔,份人又bossy,明明不用你管的你都來管,又強迫別人應同,但sorry,你的笑話真的不好笑,你的idea真的不creative,你的comment真的很on9,憑什麼我去認同你?或要你去管我?我又不是under你!更間性傳來一兩句說話來串我,真的不好笑囉!

要大家困在房裡brain storm幾小時,對著你每一句的乏味笑話和樣衰款,時間變得非常慢,思緒變得非常亂,不想被你影響,又要用雙倍氣力去按捺著自己不要發作,好累!與討厭的人一起工作,真的事倍功半!浪費精力!

我當然非常極之討厭你,討厭到要打這篇東西來發洩,某程度上我非常想你放大假,非常不想見到你的樣子或聽到你的聲音,你真的好很煩!

現在工作上有更多新變動,越來越多垃圾要吞!我忍,我等,等到出年,我就像劉醒一樣,放低支炮劈炮唔撈!然後大叫「梁非凡,你食屎啦!」或者像九姑娘一樣,對住你背脊射三槍!乞人憎!我忍!我等!

Tuesday, November 9, 2010

劉感恩:東京之旅一早比一世遙遠





東京啊,東京!我知道東京好大,好多地方值得去玩,不過我真係走唔出原宿新宿一帶!去乜鬼六本木食飯!根本走唔到出去!

親愛的依勢丹,親愛的Laforet,親愛的表參道,親愛的裡原宿,我真係擺脫唔到你!

短短三日兩夜生日旅行,馬拉松式行街,行到腳骨斷裂都值得!半夜對腳抽筋劇痛麻痺都算小事!又如何呢!

多謝同我一齊去呢個trip嘅人!成日都咁free話去就去就好喇!哈!

上年生日喺雨中暢泳,曾經寫過「28歲,大概就係要我學習,接受生命中種種不完美,開心的要盡量記住,盡量放大,不愉快的,呻過就算。」今年基本上都係抱住呢種精神去面對種種情況,仲開始埋寫感恩週記,的確會令自己覺得自己係幸運嘅一群,隨之再吸引更多好事發生。雖然有時都會沮喪、失望、自憐、埋怨、掙扎,但某程度上,面對自己時的確係舒服啲。未來仍需持續修行,將好事繼續推開去、傳出去。

今年生日喪行街,無咩感想可言,只係得個「攰」字。希望年年都咁有腳骨力,為咗得到自己鍾意嘅嘢,行得幾辛苦又有咩所謂,一切都係值得嘅。我想行落去,一直行落去。






返來之後,又要忍受對東京無限掛念......或者我前世真係一個漢奸。

飛機上的笑片






想喺飛機上笑下,不過三套戲都麻麻地好笑,有啲失望,當kill time勉強可以。

Monday, November 1, 2010

Reptilia





夠快、夠恨、夠high