工作上,對上兩個星期,幾乎都無搭地鐵放過工,晚晚都係凌晨搭的士,感覺接近絕望。一來,身體上攰,唔係好夠瞓;二來,心理上攰,因為太多因素......點解啲嘢好似無盡頭咁?我見唔到有完嘅一日,一個完咗,又有另一個,人有限,job無限。每日返工,都問自己一句:「為乜呢?」為咗份糧,無晒生活,值得咩?連人生大事都已經無晒mood同無晒力去搞。
我想結婚後做師奶,呢個慾望從來都未試過咁強烈。
好攰,終極攰。
剛剛個weekend,過咗大禮。熱熱鬧鬧,快快趣趣,都搞左半日。屋企人順便比我睇下,佢哋送咩嫁妝比我,感謝屋企人嘅厚愛,其實之前我多次同父母講,唔洗買太多嘢,唔洗太多金器或珠寶,講到明唔要鑽石手飾,但爸爸最後都係送咗,仲有阿婆留下來兩隻金呃,非常感恩。
帖印好喇,終於,又少一樣事煩,感謝身邊另一半,喺我忙到PK時,佢幾乎做晒所有嘢,有擔帶,有分數,係無錢。哈哈。



