Sunday, November 18, 2012

劉感恩

十一月是我的生日月,生日正日前兩日,原本請了birthday leave,男人訂了位去ICC食飯,但,突然又感冒,又病!又頭痛又鼻塞又鼻水,頭痛痛到癲,因為鼻竇腫脹連臉頰都痛,非常辛苦,結果飯吃不成,變成吃藥,睡足一天,連男人準備的禮物,都無精打彩下收了。我想快點病好,因為第二天就要連續shoot兩日,太病跟shoot會好辛苦。 第一日病住shoot了半天,第二日生日正日,shoot了一整天,當中有個break能回家洗個澡小休一障。生日正日的晚飯,是自己一個食飯盒。不能說是淒涼,只能說很無奈。 或者上天可憐我,其後為我彌補,哈哈,原本都沒有特別慶祝,但因為要派帖,順便和不同的朋友們食飯,而朋友們都很貼心,在我最後一個單身生日給我買蛋糕慶祝。今年吃了三個+一件生日蛋糕,老細又給我大利是及生日卡(還語重心長寫了一番勉勵說話),真的非常感激和感動。 然後,發現時間突然過得很快,十二月前有兩條片要出街,令我工作上「充實」到頂點,精神上身體上都覺得累。到我發現離大日子不遠時,就覺得有點緊張。 最近思緒都容易亂,能隨時跌入回憶中,或陷入對未來的一片茫然。有時,覺得自己還是20歲般衝動天真自我貪玩又白痴;有時又覺得,自己已經七老八十,身體差精神衰弱,好多事都看化覺得無意義不想執拗反正我都看你不順眼我寧願自己默默收皮活在自己殘陽山落的世界中與你各不相干。 十二月,快點來吧。

Monday, October 22, 2012

to Rome with love








故事情節普普通通,都有好笑地方,歐洲系列我都係鍾意情迷巴塞隆拿,但有Woody Allen親自演出又加咗分,因為佢都好耐無演出了。

Horrible Bosses


香港譯「邊個波士唔抵死」,中晒打工仔心聲。 某程度上,呢套好笑過Hangover 2,三個打工仔主角雖然唔係大卡士,但睇果三個變態老細都夠照。

Sarah's Key







女記者追尋搜查二次大戰嘅猶太人故事,本身女記者自己有婚姻問題,拋開自己私人問題,她專注於工作,努力查探,原來其中一個猶太人同自己有點淵源,再追查落去,搵完一個人又一個人,之後發現真相。電影穿插兩個年代,兩個世界,兩個不同的人物,有不同的際遇,最後竟然相連起來,女記者最後也面對了自己的婚姻問題。淡然,實在,不煽情,但最後一幕,還是不禁落淚,可能感到那種滄桑,戲中那些角色,總是要兜兜轉轉後,人生過了大半,才能面對真相。人生總是難以估計,我們從無法知道,最後我們的故事是怎樣下去,最後會否被人遺忘,但像電影裡一句說話,有些故事,總是要說出來,然後被我們記住。

非常好看的電影,為什麼總是悄悄地上映一星期後就落畫?
甚至沒有上映過?

劉感恩

忙忙碌碌咁,又過咗一個星期,無做過咩特別事,工作上繼續痛苦。但上星期為自己「心理補償」咗,狠狠地出咗一鑊血,買咗一直令我心痕痕、瞓唔著嘅寶貝,戀物狂繼續戀物,又要繼續努力搵錢。

 基本上,紅牛皮的確比較適合小一號嘅medium,試上身係完美嘅,試jumbo反而真係覺得太大,加上紅牛本身好搶,用過之後,我真係覺得medium好睇好多,感恩最後都有貨。因為擁有咗第一個medium,令我更加想要多啲細少少嘅袋,不求實用,但求好睇。細Reissue同Constance越睇越愛,我又要為自己搵下一個目標,作為我唔可以辭職、要繼續努力工作嘅推動力,幾攰都好,都要頂住。 

一直等待12月快啲來,快啲過咗果一日。婚禮嘅事煩,唔係因為件事麻煩,而係啲人麻煩。我想快啲完,快啲放假,比我一個人靜靜地過一陣,唔好煩我。



就係為咗兩餐飯同埋茶花,每日辛勞。

但我只想每日弄狗為樂。

Monday, October 15, 2012

劉感恩

工作上,對上兩個星期,幾乎都無搭地鐵放過工,晚晚都係凌晨搭的士,感覺接近絕望。一來,身體上攰,唔係好夠瞓;二來,心理上攰,因為太多因素......點解啲嘢好似無盡頭咁?我見唔到有完嘅一日,一個完咗,又有另一個,人有限,job無限。每日返工,都問自己一句:「為乜呢?」為咗份糧,無晒生活,值得咩?連人生大事都已經無晒mood同無晒力去搞。


我想結婚後做師奶,呢個慾望從來都未試過咁強烈。 

好攰,終極攰。


剛剛個weekend,過咗大禮。熱熱鬧鬧,快快趣趣,都搞左半日。屋企人順便比我睇下,佢哋送咩嫁妝比我,感謝屋企人嘅厚愛,其實之前我多次同父母講,唔洗買太多嘢,唔洗太多金器或珠寶,講到明唔要鑽石手飾,但爸爸最後都係送咗,仲有阿婆留下來兩隻金呃,非常感恩。

帖印好喇,終於,又少一樣事煩,感謝身邊另一半,喺我忙到PK時,佢幾乎做晒所有嘢,有擔帶,有分數,係無錢。哈哈。




Tuesday, October 2, 2012

劉感恩

2012年係「行動之年」,我諗得出,就要做得到;今年,拿獎(雖然只係銅獎但好過無啦),養狗,紋身,結婚,只要想,就去實行,如果今年真係世界末日,咁我都了咗部分心願,無憾。未來,我想睇中醫,搬屋,養多隻狗,同埋辭職唔做,哈哈哈。我要努力啲去搵辦法實現我嘅目標......只係時間遲早問題,我對上天祈求,比多少少耐性同能力我,我想做自己想做嘅嘢,過自己想過嘅生活。 但所有事都有代價,拿獎背後是長時間工作,養狗就無咗自由多咗責任,少出街唔去得旅行連honeymoon都唔想去,紋身痛足3小時肌肉都痛埋,結婚係要花錢同埋煩惱無數事......但我仍然滿足感恩,唔易捱都要捱過去。

非常期待下一次,我想整腳。

任何日子,唔止節日,同朋友們食飯飲嘢吹水、同屋企人食下飯都好開心。

放4日假long weekend對住呢隻嘢仲開心。