Friday, May 8, 2009

罷睇歐聯

呢兩日睇咗好多有關車仔對巴塞嘅新聞、文章、留言、片段......

杜奧巴爆粗失控、波歷克被嘲笑、挪威球證嘅「突出表現」,真係越睇越為一眾藍戰士心痛,難得泰利賽後表現冷靜,仲大方去對方更衣室握手示好,實在揪心的痛。泰利成熟咗大個仔喇,經過上年慘烈結果,今年不可能比上年更難受,隊長久歷滄桑,強顔歡笑、故作鎮靜功力大增,不過誰明浪子心呢?

如果摩連奴仲係到,佢一定會鬧到飛天,插爆歐洲足協,怒隊球證。因為佢最難忍受唔公平,而今次成件事,唔公平嘅程度,係去到好醜惡。

當你破滅咗球迷嘅單純希望同意願時,瘋狂熱情一下子蒸發晒,夢醒時分,就知道自己之前錯愛,對一個假情假義嘅比賽寄以真情,流過不少眼淚,終發現自己戇不可及,慘被玩弄。

幸好呢個賤賽突然同你反面,用最低水平嘅手法,去破壞大家嘅憧憬。終於都有機會醒過來,痛定思痛,反省再反省,就知道出年再與你重遇,就不會再動真情,大家逢場作興,終於能夠用平常心去面對呢個仍未得到嘅賤賽,亦都打破咗「得唔到就係最好」嘅一廂情願。

今年決賽我決定罷睇,底都穿晒,有咩好睇?




在此支持杜奧巴同波歷克,爆粗係有問題,不過咆哮得真係好!

No comments:

Post a Comment