Tuesday, December 8, 2009

暴飲暴食之旅

去澳門,不外乎賭賭錢,飲飲食食,第一晚去應酬食魚翅,原煲一梳梳,都幾多,
可憐的鯊魚,不過個湯底都幾好。

原隻鮑魚,夠鮮味。其他食物普通啦,無影相。

第二日去咗珠海,按摩真係平到笑,$40蚊一個鐘,按足兩個都係$80又唔收tips,又無呃鐘。

樓下張相係一間蒸飯連鎖店「真功夫」,一個套餐有飯有湯有小食有菜,三十幾蚊係大陸算貴,不過又真係幾好味,我食晒成個冬菇雞肉蒸飯!(留意:個碗都好大)
幾時香港先開返間?好味過吉野家!

之後夜晚去「灣仔」繼續食鮑魚,果皮蒸,普通咁啦。

椒鹽瀨尿蝦,超惹味,食到口都腫。

豉椒炒花甲,殼多過肉,有啲被坤。
蒜泥蒸聖子,超好味,底層啲粉絲索晒啲汁,真係超超超正。
海膽蒸水蛋,普普通通。
燒蠔,個樣就惹味喇,食落去完全唔得,燒得太耐,又腥。成餐每人$60,平到笑!
第三日過返澳門,下午茶去咗食水蟹粥、葡tart、豬扒包,仲要去鉅記狂試食,夜晚仲未消化晒,就去新葡京食buffet,真係有暴飲暴食之感。

去到立即食生蠔回本先啦,又大又肥美又鮮甜,讚!!!
其他海鮮都唔錯架。

仲有好多美食影唔晒喇,整體新葡京個buffet幾好,環境好,食物好,價錢二百幾蚊,勁食生蠔的話算好抵。

好耐無去大陸,上次去珠海已經係廿幾年前嘅事......感覺真係好古怪......我覺得大陸仍然污糟,一街都係垃圾,啲人都係古古怪怪咁,總之未能做到「若無其事」返大陸,好介意某啲古怪服務態度,或者無禮行為......而基本上,澳門都係充滿大陸人,特別係賭場,感覺不太良好。

三日兩夜走來走去,去咗好多地方,舟車勞頓,返到香港真係攰到pk......散晒......真係散晒......

有無滅少滾瀉水危機呢?少少啦,雖然有時都會有想喊嘅衝動,不過心情的確放鬆咗少少。有時係我諗得太多,有時係我唔識諗,有時係我完全唔想去諗......到底可以點?

No comments:

Post a Comment