有天一醒來,腦裡就是《麥兜與雞》那首歌,刷牙換衫化妝準備出門前,腦中不停響著:「但現實就似一隻鴨,下下一定要Duck。唔得!唔得!點算喇?點樣令隻雞變做鴨?」之後loop足全日。
係囉,雞點變做鴨呢?點樣變做duck呢?我都唔知,好迷罔。
自己好多嘢都係唔得,從公到私,無咩嘢係得。戇戇居居,咁就半世。無咩成就,無事業,無錢,無自己一個家庭,無兒無女,無車無樓,無青春無靚樣無身裁,無頭腦,無學識,無志氣,無目標無理想,依家好似連健康都無乜。
覺得自己係「百無青年」,只有一肚悶氣,只係識玩識飲飲食食識搞爛gag。
唔知點開解自己,唔知自己可以點,唔知自己可以戇居到幾時,玩到幾時。
所以有時我想快啲到三十幾四十幾歲,到時我的確可以相信自己人又老錢又無,正正式式接受自己係個不折不扣嘅loser,攞正牌做個official廢物,百份百肯定人生再無希望,名正言順地絕望冷看人間;都好過依家仲係2字尾,仲要為追趕人生30關口前做埋啲無謂嘢,或,對人生仲有少少期望,其實自欺欺人。
做人有咩意義呢?我依家明白,點解人要結婚生仔,因為只有呢樣嘢係實在地剝奪你所有自由同選擇,無晒所有自由之後,你只得一個選擇,你無必要再思考人生各種可能,你只需要建立、照顧一頭家,用盡你所有心血同精力,無餘暇無閒愁。而一個家庭俾人嘅意義,往往就係做人嘅意義。除此以可,人生仲有咩意義呢?
除非你係航海家、浪流旅者、極地科學家,可以四周圍去見識,開闊眼界,人生都仲好似有啲意義。
除非你係無國界醫生、研究藥物科學家、拆地雷義工、德蘭修女跟班,可以周圍幫人救世,咁又有另一層人生意義。
不過,如果你只係一個普通打工仔,為口奔馳,勞心勞力只為雞碎人工,為生計為餐飯,甚至乎唔知為乜,人生又有咩意義呢?
我好想逃走,好想逃避現實,好想可以好似某啲人唔洗踏入社會活喺自己世界自得其樂,好想成為另一樣生物,唔想做人……
我自己對自己都無咩期望,其他人更加唔洗旨意對我有期望。
但現實就似一隻鴨,下下一定要Duck。唔得!唔得!點算喇?點樣令隻雞變做鴨?
大家咁話。。。
ReplyDelete我成日load住果首歌係:
想我都好想好似中左頭獎,有野吾洗做,老細又吹我吾脹。