


真人真事改篇,呢套戲背景係60年代美國南部,黑人同白人階級分明,種族主義非常強勁;女主角係典型被黑人傭人湊大嘅白人,佢眼見好多唔公平嘅事,於是佢鼓起勇氣,打破當年禁忌,親身接觸訪問多位傭人集結出書,據說當年該書曾經受過60多間出版社拒絕,最終成功絕非易事。
戲裡面有好多令人心酸場面,例如黑人傭人自己個仔慘死,自己骨肉無咗,但每日就幫人湊人哋骨肉;侍奉咗大半世幾廿年嘅女主人因為面子關係,就突然開除連再見都無得講。
而香港人絕對有必要睇呢套戲,特別係屋企有請菲/印傭,戲裡面傭人唔可以去屋內廁所,要去屋外傭人廁所,其實香港有啲外傭都係咁,不過普通香港屋細無多個廁所(有間工人房都偷笑),顧主竟然要佢哋去會所沖涼或去廁所,同戲裡又有咩分別?戲裡黑人傭人都還可以每日搭巴士返屋企,夜晚都仲可以見下仔女,但香港外傭一年都返唔到去家鄉一次,睇住人哋仔女長大,而自己錯過自己仔女嘅成長過程。
雖然成日都有外傭負面新聞,但應該都仲有不少好傭人,幫手照顧每個家庭。
No comments:
Post a Comment