Tuesday, December 27, 2011

心情複雜的聖誕

讓我寫下聖誕節前後發生何事:


22號,做冬,早收工,興高彩烈回家,然後去阿姨家做薑餅,再去舅父家做冬,很充實很高興的一日。

23號,照常返工,但已經十分holiday mood,人在公司心在其他地方,根本無法集中;晚上去朋友的婚宴,都幾感動,雖然去得婚宴太多覺得很膩,但仍然祝福他們白頭到老。

24號,平安夜,假期第一天,起身不久就去圓玄學院還神,新年時攝過太歲,保了一年平安,今年算過得不錯,當然要有借有還,希望來年繼續平平安安;然後去食lunch再買餸準備晚飯,還有時間在下午去跑個步,冬日沿海跑步的確舒服,晚上在家中吃,還收到驚喜聖誕禮物(可能生日沒有禮物大發雷霆後有所改進)。平安夜,很平安過了。

還拍了下面這個照片,但拍照後阿甘不慎從小櫈跌下(其實是我不慎,看管好牠始終是我的責任)我以為無事。



25號,見阿甘有點頭搖搖,企不穩,仍不以為意,因為牠之前一向都有此傾向,年紀大腿肌肉退化。晚上出去和朋友玩足一晚,又飲又食又交換禮物。回到家時阿甘還算正常。

26號,boxing day,之前一晚玩得太夜,好遲才起身。阿甘情況在早上還可以,但到下午開始惡化,晚上幾乎完全行不到,一仆一碌,站也站不起來,但扶住牠又能吃又喝。擔心到頂點,有一刻以為牠真的快要死了!有時發現自己在喊,但下一刻又同自己話喊都無用,冷靜去處理更重要,又忍住不再喊,心情真的擔憂到極。但牠仍然有胃口有便便(對於兔仔來說這是十分重要)那我就安慰下自己,還未是時候。晚上吃令人有睡意的抗敏藥幫我入睡。

27號,整天都在等下午去看獸醫,心情忐忑不安,我有腦裡重覆問自己很多問題,包括如果獸醫建議安樂死,我要怎樣決定,在腦裡想出幾個方案,例如要去第二間診所,找哪一個獸醫詢問second opinion,找其他治療法例如針灸,我都一一想好了。總之我不能一下就接受安樂死,基於一個重要因素就是牠還有胃口有便便。

去到獸醫檢查,獸醫問兔兔發生何事,我就眼淺起來控制不住,真是沒用,多番告訴自己要冷靜都是沒效,一見到仁慈的獸醫就像見到救星一樣想哭。還是需要男友去講,幸好有他在身邊;這兩天,不是我在哭,就是他在哭,總之不會兩個人一齊哭,像輪更一樣,你哭時我就冷靜,互相支持住,這比兩個人一齊哭更好。

獸醫檢查後,發現牠沒有跌傷骨折之類(謝天謝地),而牠一直在失平衡、頭傾左,是因為另一個在兔仔很普遍的毛病:側頭症 (參考link,起因一)之前牠的耳朵發炎感染一直未好,加上年老抵抗力弱,平衡器官在細菌的影響下,令牠不能企得穩。

獸醫開了藥,助理細心講解,我們才知道這不會致命;但擔心病情會令甘甘沒有胃口不進食,所以開了很多藥和補充劑,都是令牠有腸胃蠕動,非常關鍵。

藥很多,要分得清楚。


甘甘躺在牠的山洞裡休息,加上即棄式吸尿墊;唉,見到那雙小腿就想哭。



病了的老兔因為行動不便,整天只能躺著大小二便,還有牠不能自行清潔自己,唯有靠我們加緊觀察、照顧牠,抹身抹面、餵水餵食餵藥,家裡彷彿多了個深切治療部,我們兩個人都成了私家看護。經常要蹲下、跪下或屈著身體,很快我就腳震和背脊肌肉痛。

28號我就要返工了(怎樣集中工作呢?無時無刻都有想甘)唯有靠在放假的男人,感謝整個過程都有人相伴,大大分擔了很多壓力和額外照料的負擔。誠心祈求甘甘快點康復,至少能自己站著坐著。經過今次,我更加確定我不想要小孩,小動物我都搞到頭都大,更何況是小孩,我真的沒有心力或體力去擔憂。沒有養寵物的人是不能理解這種感覺,或者現在我才能體諒父母的百分之一的心力交瘁感,去party去玩去狂歡去環遊世界,養了動物,有了責任,就沒有你的份兒了。

但無論如何,祝甘早日康復。

Monday, December 19, 2011

新電視


屋企電視壞壞地,原本打算忍住唔買住,直到開一次電視要用5分鐘先開到,就覺得係時候要換喇。一去到電器鋪,十間有九間都叫你買最新型號3D電視,最平都要萬幾蚊。難度要花萬幾蚊去睇《天與地》?傻的嗎?本身直頭對3D抗拒(老人家拒絕新事物),所以最後買部約6千蚊嘅高清電視夠喇,仲加多部blu-ray機;新電視睇劇集或blu-ray碟,都有「清到嘔」嘅感覺!我以為舊果部(約4年前買)已經好好,點知原來新高清電視係另一個境界!

另一個好處係新電視可以睇到電腦檔e.g. avi, mpg,即係我大量download嘅外國劇集或電影,之前要用部macbook睇,依家可以舒舒服服、名正言順咁用電視睇!而且畫質ok!真係好開心!因為用macbook睇mon太細真係辛苦!一部新電視令我有種「屋企升咗呢」嘅感覺,距離「5星級的家」更進一步,哈哈。

熱切期待今個聖誕假期,留喺屋企宅到無朋友咁日日煲劇睇戲呀......

Sunday, December 18, 2011

劉感恩

1)上星期工作上都係一樣咁痛苦,更多濕濕碎碎煩嘢,加上要同個客周旋,煩到人都癲,直屬上司放假,所有嘢就交俾我同另一個同事做,無人照住,又係一個試練比自己,真係要努力去做好每一件事。但加上M痛,全身都有痛,全身都有形容唔到嘅不適,力都無,仲要起身返工簡直係慘烈......我強烈要求香港立法每個月有M假一日,比女性最辛苦嘅一日有得休息下......

2)星期六得返半條人命,留家休息,住家男人上次煎倉魚失敗(皮爛),今次再試終於成功;同埋再試煲菜乾湯,冬天飲碗熱湯真係好warm。


3)星期五公司有function,晨早上到山頂廣場,在某餐廳食早餐;全公司人多到嘔,根本無可能認得所有人。高高興興一個朝早,之後落山去同事嘅個人展覽,再行下街然後返屋企,已經攰到嘔電......

4)星期日朝早出去飲茶,然後去睇MI4(出乎意料好睇);夜晚去咗荃新天地新開張嘅大戶屋,水準同康山果間類近,都係咁好食。(可惜我全日頭痛,未能盡情享受,要用止痛藥送飯)

5)好少支持個客支持得咁盡,但今次Hello Kitty x Tokidoki又的確好得意,製成品嘅品質都唔錯,所以都換咗3隻,上網玩遊戲仲有得換毛公仔版本,我日日都好努力玩㗎喇!不過未成功!

6)天氣凍,唔想老甘凍親,用我件舊毛衣剪開佢,做咗個cover蓋住阿甘瞓覺嘅「山洞」,做咗間「小紅屋」比佢;佢當然好冧,成個頭攝入去個手袖位到,包住個頭暖笠笠咁瞓,真係叫佢都唔願醒!

Monday, December 12, 2011

劉感恩

1)上星期突然好忙......所有job都湧出來,全部都又急又濕瑣又煩,見到都想嘔,有啲令人發癲。但都係要做,只能夠默默忍受,期待聖誕快啲到,我想放假呀!基本上今年無咩放過假,無真正休息過,無真正旅行過,有啲灰,放假喺屋企hea下都好過無。

2)廚房多咗好多新廚具,好得人驚,整咗個煎倉魚,買咗個新煲,又繼續煲湯,煤氣費應該會高過之前。


3)另一個煤氣費上升原因,就係開始煮便當帶返工食,上星期煮咗三日,要早啲起身煮飯其實真係好攰,特別天氣凍!但可以慳到錢又幾開心(慳得少少就想去買嘢,真係敗家)。同埋有人送咗個新飯盒比我,靚好多!
4)星期五同星期六連續打兩晚邊爐,結果生咗兩粒暗瘡(哭)。但天寒地凍我真係控制唔到果種口慾囉。同朋友兩條友任食火鍋,食咗成晚,食完一直吹水,汽水任飲,每人都係百幾蚊,真係幾抵。星期六返屋企打,始終都係媽媽好,打邊爐之餘又有下火湯飲。

5)週末雖然好凍但好陽光,無咩藉口唔出去運動下跑下步。跑去汀九,回程時更發掘下汀九一帶海邊沙灘,發現一個好靚又無乜人嘅公園,淨係有人釣魚,同埋發現一個有得打沙灘排球嘅沙灘,感覺真係好放假feel,陽光,海灘,打排球,嘻笑,釣魚,寧靜......住喺果頭嘅海邊真係好正,仲路經見到蘇民鋒間屋。一路跑時,因為多斜路,所以真係好辛苦,臨跑完時差啲抽筋(好耐無跑過,天氣凍只係想呢埋喺被窩裡面......),跑返屋企時頂唔順,要食個下午茶補充下。

Sunday, December 4, 2011

劉感恩

1)上星期中返工帶咗兩日飯,成功慳咗兩日錢;為咗達到「唔用微波爐翻叮」原則,所以本小姐晚上放工買點餸,清洗切好,然後第二日一朝早煮,午飯時就直接食。我無保溫飯盒,慢慢接受室溫食,與同事朋友研究點樣整一個好食嘅便當,其實除咗慳錢,仲食得健康啲,又有滿足感,希望一星期都煮到兩、三日啦。

2)朋友生日去食飯,Classified嘅大坑分店比人感覺溫暖自在,一圍人食下嘢吹下水幾開心。

餐前小食:班尼迪蛋,水牛芝士蕃茄多士,羊奶芝士沙律,
全部都超好食,個蛋仲要叫多一次先夠喉。
芝士的世界:焗芝士配麵包,中型芝士盤
焗芝士香滑漏出來,擦上鬆軟麵包上,真係好食到喊;
芝士盤都係牛奶芝士(因為羊奶太臭喇,有人食唔到),由強到淡味共5款,配紅酒真係好正,但9個人食唔晒,最後壽星仔打包剩底果啲。
Pasta的天地:四款都好食,醬汁好出色,risotto夠正宗,
新鮮home-made egg pasta夠晒蛋味。
pizza我覺得正常好食,無咩特別,夠薄夠脆。
好豪華嘅生日蛋糕,成為一道好好嘅飯後甜品。

3)因為上次寫一寫我家男人嘅住家菜,今個週末佢繼續試煮新嘢(睇下幾時厭),同埋唔知係咪激發起佢嘅「煮婦」DNA,竟然買咗大量廚房新器具,水煲、油樽、刨皮器、刀、調味樽、收納盒......好驚,有人會變全職煮婦。

星期六整咗蕃茄洋蔥魚柳,開開胃胃;同埋繼啫啫雞煲後,整咗個啫啫芥蘭煲,但係好咸囉!
老火湯就有菜乾紅蘿蔔湯,好滋潤嘅感覺。

4)星期日出去「襯」,尖沙咀海港城年年都聖誕都佈置得好靚,但實在人多到呢,好似全香港人都迫晒喺同一個地方,再加埋大陸人,去到真係舉步難行!每行半步就想爆粗!真係迫到嬲!
但呢個三眼仔聖誕樹又幾好笑嘅。

同埋出去行街嘅重點,其實都係想買嘢者。
自己送俾自己聖誕禮物(聖誕節真係一個買嘢嘅好藉口)又靚又實用,終於買到好開心。
但當然,係人送的話會更開心囉(酸溜溜),
有啲嘢真係女人先明白,同埋有啲嘢女人真係唔會明白。

Tuesday, November 29, 2011

雄性住家菜

我家中的那個男人,剛拍拖時,聲稱自己雖未致於五星級大鼠,但煮飯都算好食;好快有機會下廚,第一次整了一個咸魚煲仔飯和炒白菜(好遺憾沒有拍下照片來),都算ok好食,起碼飯是熱的熟的有焦的,菜是油的有味的,而且本小姐極喜歡咸魚,有咸魚伴飯什麼也能吃得下。其後搬家同一屋簷下,下廚機會多了,有時我煮,有時他煮,他煮的情況是:1,我太累不想煮,也不想叫外賣;2,他嫌我煮得難吃,看不過眼就自己來。(沒辦法,我慣了少油少鹽清清淡淡,也沒有當全職煮婦的經驗,那我怎麼能煮的像他的媽媽一樣好呢?)

最初他經常煮煲仔飯,將他的招牌菜發揚光大,頻密到一個地步是,煮到連瓦煲都爆爛了。然後厭了,再試弄別的,原則都是要base on「易整」,例如:

豆豉鯪魚油默菜,雞翼(煎、烤、鹵水都有)
這兩款菜,起碼做過一百次。(其實還有蒸水蛋,應該超過兩百次)

雞翼的狂熱冷卻點之後,再來其他「招牌菜」(左起):
超濃蕃茄蛋(見到不蛋!)黃金炒飯(有時用新鮮飯)西蘭花雞柳
這幾味,吃過也不下百次。


有時煮炒意粉,都幾好食;中間還是雞柳,不過換了三色椒;
最右是清蒸龍躉肉,之前與家人打邊爐試過真的很鮮很好食,所以自己買來試蒸,但發現原來很貴所以蒸了一次就放棄了。這算是一個昂貴的新嘗試。


最近,他在荃灣的「民豐」買餃子結我食,雖然是素餃,但我一吃愛上;結果,我們最近都變成北方人,幾乎每星期食一次民豐的餃子(要我天天食也不介意)另外民豐的韭菜煎餅也是好吃得過份。


但是他心血來潮,可能做北方人做耐了餃子吃多了,於是他開始pick up廣東的傳統:煲湯。
也有另一個原因,就是他嫌我煲的湯不夠料,不夠好味(老娘又不是廚娘!)
所以有一個週末,他去街市買菜,回來時大包小包,買了十個人的份量來煲!
以下就是那個青紅蘿蔔豬骨湯,而且他只顧煲,沒有加水,結果只煲得兩大碗,湯濃不見碗底。

到他學會煲湯時間中加點水之後,就再學做其他新菜色,以下是他最新秋冬傑作:
啫啫雞煲。這個菜,我回家時在家外的走廊都能聞得到香味,一進門香到口水直流。

基於我這個愛食菜的人要求,通常每餐都有菜。以下是吃得最多的豆苗、西蘭花和菜心。

當我想記下他煮過什麼時,才發現當初由每餐食雞翼,到今天連湯都學會煲了,真感動啊。經我的悉心栽培下,令他先厭棄我煮的飯,然後令他踏上煮飯之路,成為一個住家菜,我的育成計劃算是成功了一半。未來我還想吃八寶鴨、蒸魚腸、炆花鱔、blueberry cheese cake...etc.

Sunday, November 27, 2011

劉感恩

1)星期四與舊同事食飯,舊公司很多人將會辭職或調到別處,很多farewell,乘機聚聚。有時會懷念舊公司的簡單,細公司始終沒有那麼多鬥爭或顧忌,麻煩人也只是少數,大部份的同事都很好。但那種安逸的日子,離我已遠了......

2)星期五有口福,撐枱腳食意大利菜,那個薄餅很出色。

3)星期六自己在家煲湯(但不用我動手,哈哈)又有靚湯飲,好滋潤好正,年輕時不明白湯水的好處,現在像個婆仔一樣喜歡喝湯,加上早已搬離娘家,工作又忙,更加珍惜每一碗湯,與家人同住或常回家食飯的人是不會明白的。

4)星期日family day,表姐漲起的肚皮好搞笑,好想快點見BB出世,我要做人Auntie了!預產期雖然是出年,但現在我已經很緊張和興奮,保護族群裡幼小的人類本能誘發了出來,哈哈。

5)六千元已到手,但這零用錢真的沒有什麼大作用,不夠我交稅,不夠我買想要的東西,再次證明人是貪心的,而且不是人人都會善用六千元,道友買白粉K仔,綜援細路去買iphone ipad,你又吹咩?所以我寧願政府不派糖,我們不是澳門沒有賭場,沒有那些像天跌下來的博彩稅,政府不如善用納稅人的錢去改善好民生問題,比派糖更有效率、更長遠地去令社會和諧,那才是每個香港人的糖。

6)好想聖誕節快點來,那我就有藉口買東西,為自己買「聖誕禮物」了。