Saturday, July 24, 2010

唔係好識

好多嘢,其實我都唔係好識,唔係完全唔識,只係識少少又有好多唔識咁。

就好似:

﹣唔係好識表達自己。經常詞不達意,或多或少係天生性格,亦都有少少職業病影響,每個字,無論講定寫出嚟之前,都好似要諗一大輪,結果因為諗得太多,講得太少,人哋就明得更少。然後我就好快跳到去結論:無人明白我。

﹣待人處事。我好老脾時,可以笑面迎人,禮貌周到,處處包容;唔好老脾時,把嘴臭過屎坑,賤到跌落街,發起火時同原始人無分別,野蠻惡死殺人王都無我咁狠。不過事後往往後悔萬分,原來我本性善良(偷笑),爆完一輪之後,就覺得自己出口傷人,惡毒無比,慚愧不已。

﹣同親密嘅人相處。無論屋企人,定係另一半,某程度上我都覺得大家係相處唔到。只要同我同一屋簷下嘅人,都會覺得我難頂,因為我需要極大極大私人空間,最怕人煩我,特別係我專心做緊自己嘢時,有人打擾(人哋只係問你一句:你食唔食飯呀?)我就立即發忟憎喇;再講多兩句,依依哦哦,我就發癲喇。呢個本性我真係唔知點改,我好想話,有時唔係我難相處,而係好多人都好「有入侵性」,唔識得保持距離(但當距離太大時我又唔鍾意,你話一齊生活,真係煩到爆)我真係唔係好識,兩個人應該點相處。

﹣面對討厭嘅人。我一覺得果條友乞人憎,就好難改變感覺,佢永遠都係咁乞人憎。佢講一句嘢,都覺得嘈;見到佢個樣,就覺得煩。我又扮唔到友善,又唔會直接打擊人,所以我面對乞人憎嘅人,就係避得就避,盡量避免接觸,就唔駛煩。無奈現實果啲乞人憎嘅人,每一日都係你身邊,好似七仔咁緊有一個係附近,仲要成日主動煩住你,真係好痛苦。我嘅黑面同冷淡其實都好明顯,點解啲人都仲係唔識趣?點樣先可以趕絕討厭嘅人?





最近情緒真係好低落,厭世程度極高,因為發生太多不愉快事件,直頭有啲抑鬱。我知自己某啲位係「唔達標」,唔稱職,唔係一個「妥當」嘅人。不過當我成日遷就其他人、顧及其他人、做好人後,咁邊個嚟就我?邊個顧及我感受?邊個尊重我?邊個體諒我?

我知我唔可以無止境咁要求人哋去遷就我或體諒我,不過我都有攰嘅時候。我唔係想無止境,我只係想大家公平啲者。我想對自己好啲,我想自己自私惡毒時無罪惡感、無內疚感,我想做只係自己想做嘅,我想不負責任,我想抖抖氣,我逃離去另一個地方。因為我唔係好識,點樣同世界所有人相處,包括我自己。

No comments:

Post a Comment